Më shumë se 20 mijë persona u mblodhën në qendër të Bukureshtit në një ngjarje të veçantë, ku u vendos një rekord i ri botëror dhe u mblodhën fonde për shëndetin mendor të fëmijëve.
Ngjarja “Masa care unește” – “Tryeza që bashkon” u zhvillua më 12 shtator përgjatë Bulevardit Unirii deri te Sheshi i Kushtetutës. Guinness World Records certifikoi tryezën me gjatësi prej 5.055 metrash, duke e shpallur më të gjatën në botë të ndërtuar nga materiale të riciklueshme.
Për rreth 20 mijë pjesëmarrësit u përgatitën po aq racione ushqimi, ndërsa në total u përdorën më shumë se pesë tonë ushqime, përfshirë gatime tradicionale rumune, ëmbëlsira dhe fruta.
Por përtej rekordit, ngjarja kishte një qëllim humanitar. Fondet e mbledhura do të përdoren për ndërtimin e spitalit të parë të psikiatrisë pediatrike në Rumani, në kompleksin e Spitalit Klinik të Psikiatrisë “Prof. Dr. Alexandru Obregia” në Bukuresht.
Objekti pritet të ketë rreth 3.900 metra katrorë dhe pesë kate, ndërsa kostoja e projektit vlerësohet në rreth 16.5 milionë euro. Përfundimi i tij synohet për vitin 2027.
Sipas të dhënave të cituara nga Associated Press, rastet e rënda të problemeve të shëndetit mendor te të rinjtë në Rumani janë rritur nga 3.839 në vitin 2018 në mbi 5.600 në vitin 2024.
Kjo është hera e dytë që organizata “Bloom The World” vendos një rekord të tillë. Në vitin 2025, ajo kishte ndërtuar në Alba Iulia një tryezë prej 2.782 metrash, rekord që tani është tejkaluar ndjeshëm në Bukuresht.
Sinjali – aty ku e vërteta flet para lajmit!
