Presidenti amerikan Donald Trump ka nënshkruar të premten ligjin që i mundëson SHBA-së të vendosë sanksione të gjera ndaj Rusisë, me synim që ta shtyjë Moskën t’i japë fund luftës në Ukrainë.
Ligji, i njohur si “Lindsey O. Graham Sanctioning Russia and Iran Act”, u miratua dy ditë më parë nga Dhoma e Përfaqësuesve me 262 vota pro dhe 159 kundër, raporton The Guardian – transmeton Sinjali.
Legjislacioni synon të godasë të ardhurat e Rusisë nga nafta dhe gazi, si dhe vendet që vazhdojnë të blejnë energji ruse. Ai parashikon gjithashtu sanksione ndaj zyrtarëve politikë e ushtarakë rusë dhe rrjeteve të huaja që ndihmojnë Moskën të furnizojë makinerinë e luftës dhe të anashkalojë sanksionet.
Ligji prek edhe flotën ruse të të ashtuquajturave “anije fantazmë”, të cilat janë përdorur për të transportuar naftë ruse pavarësisht kufizimeve ekzistuese.
Në të njëjtën kohë, ligji i jep Trumpit kompetenca të gjera për zbatimin e masave, përfshirë vendosjen e tarifave ndaj vendeve që blejnë energji ruse ose ndihmojnë Moskën t’u shmanget sanksioneve. Tarifat mund të arrijnë deri në 100 për qind.
Këto kompetenca janë kundërshtuar nga një pjesë e demokratëve, të cilët kanë shprehur shqetësimin se ligji i jep presidentit shumë hapësirë për përdorimin e tarifave ndaj vendeve të tjera.
Sinjali – aty ku e vërteta flet para lajmit!
