Presidenti i SHBA-së, Donald Trump, ka kërcënuar se do të ndërmarrë masa ndaj Bashkimit Evropian (BE), nëse blloku ecën përpara me propozimin për ta bërë Kanadanë anëtaren e parë “asociuese”.
Marrëdhëniet e Kanadasë me SHBA-në – që për një kohë të gjatë janë konsideruar si partneriteti i saj më i afërt – janë përkeqësuar muajt e fundit, ndërsa kryeministri kanadez, Mark Carney, po zhvillon marrëdhënie më të afërta me BE-në.
Javën e kaluar, Carney tha se po kërkon një “aleancë unike” me Brukselin. Ndërkaq, në fjalimin e saj për gjendjen e Bashkimit, presidentja e Komisionit Evropian, Ursula von der Leyen, tha se dëshiron të punojë për “hapjen e derës” për Kanadanë, gjë që do të përfshinte lidhje më të afërta në disa sektorë kyç.
Duke folur me gazetarët mbrëmjen e së mërkurës, Trump tha: “Nëse e bëjnë këtë, nëse mendoj se është në ndonjë mënyrë një akt armiqësor, do të vendos tarifa shumë serioze ose do të ndaloj tregtinë me Evropën për shumë gjëra. Dhe kështu, nëse e bëjnë këtë, nëse Evropa e bën këtë me qëllim të keq, do të vendosim tarifa shumë të rënda ndaj Evropës. Nëse është me qëllim të mirë, atëherë është në rregull.”
Carney pritet t’i drejtohet Parlamentit Evropian në Strasburg të Francës më vonë gjatë mëngjesit. Ai do të marrë pjesë në mbledhjen plenare të Parlamentit si mysafir nderi.
Sinjali – aty ku e vërteta flet para lajmit!
