Presidenti amerikan Donald Trump ka deklaruar se SHBA-ja i ka ndalur sulmet ndaj Iranit pasi, sipas tij, Teherani kërkoi një pauzë dhe një mundësi për bisedime.
Duke folur për gazetarët gjatë udhëtimit me avionin presidencial “Air Force One”, Trump tha se zyrtarët iranianë i ishin drejtuar SHBA-së me kërkesë për ndaljen e sulmeve.
“Ata na kërkuan shumë mirë: ‘Ju lutemi ndaloni, le të takohemi’. Dhe kjo është ajo ku jemi tani, të shohim se çfarë do të ndodhë. Nëse nuk arrijmë një marrëveshje, ne kthehemi te e njëjta gjë”, deklaroi Trump.
Pauza erdhi pas gati dy javësh sulmesh amerikane ndaj Iranit, ndërsa presidenti amerikan dhe këshilltarët e tij po shqyrtojnë hapat e ardhshëm ushtarakë.
Sipas raportimeve të CNN, zëvendëspresidenti JD Vance dhe shefi i Shtabit të Përbashkët të Ushtrisë amerikane, gjenerali Dan Caine, kanë shprehur shqetësime për përshkallëzimin e mëtejshëm të fushatës, përfshirë rezervat e municioneve amerikane dhe pasojat e mundshme të një konflikti më të gjerë.
Trump paralajmëroi se sulmet do të rifillojnë nëse palët nuk arrijnë një marrëveshje të re për armëpushim.
Sinjali – aty ku e vërteta flet para lajmit!
