Dy marinarë janë të zhdukur dhe 23 të tjerë janë shpëtuar pas një sulmi ndaj një naftëmbajtëseje në Ngushticën e Hormuzit, ka bërë të ditur Omani.
Qendra e Sigurisë Detare e Omanit njoftoi se anija “El Gaia”, e cila lundron nën flamurin e Panamasë, po tërhiqej drejt një porti omanian të martën, pasi një zjarr shpërtheu në dhomën e motorëve. Sipas autoriteteve, anija u sulmua rreth 1.3 milje detare (2.4 kilometra) në veri të gadishullit Musandam, raporton BBC – transmeton Sinjali.
Të hënën, Garda Revolucionare e Iranit deklaroi se naftëmbajtësja kishte goditur mina detare dhe kishte marrë flakë ndërsa po kalonte nëpër një rrugë që e përshkroi si të kufizuar dhe të pasigurt.
Megjithatë, ushtria amerikane e kundërshtoi këtë pretendim, duke thënë se raportimi iranian ishte i rremë. Sipas saj, anija ishte goditur nga një raketë iraniane muajin e kaluar dhe më pas nga një dron gjatë fundjavës.
Ndërkohë, Qendra e Operacioneve të Tregtisë Detare të Mbretërisë së Bashkuar (UKMTO) tha se kishte marrë një raport për një zjarr në një anije, e cila ishte goditur nga një predhë e paidentifikuar gjatë kalimit nëpër Ngushticën e Hormuzit në orët e para të së dielës.
Sinjali – aty ku e vërteta flet para lajmit!
