Kosova ka kaluar një tjetër 24-orësh me raste të shumta policore, nga vendimi i Gjykatës së Apelit për zgjedhjen e anëtarëve të KGJK-së, te dhuna në familje, përleshjet, armët dhe vjedhjet.
Në Prishtinë, një shtetase e Kolumbisë dyshohet se ka lënduar një person dhe ka dëmtuar pronë, ndërsa në Zubin Potok një 18-vjeçar ka pësuar frakturë të dyfishtë në nofull pas një rrahjeje. Në Pejë, një grua ka pësuar lëndime serioze pas dhunës së dyshuar nga bashkëshorti.
Në Mitrovicë të Veriut dy të rinj janë sulmuar nga disa persona, ndërsa në Graçanicë një konflikt në një firmë ka përfunduar me sekuestrimin e një arme. Në Prizren, një përleshje në Ortakoll ka përfunduar me të shtëna me armë dhe një person të plagosur.
Në Prishtinë është raportuar edhe vjedhja e një pistolete nga një banesë, ndërsa në Gjilan një zyrtar policor jashtë detyrës është sulmuar pas një përplasjeje në komunikacion. Në Han të Elezit, një person është ndaluar për shkak të një urdhërese aktive gjyqësore.
Sinjali ju sjell përmbledhjen e ngjarjeve.
Gjykata e Apelit vërteton vendimin për zgjedhjen e anëtarëve të KGJK-së
Gjykata e Apelit ka refuzuar ankesat e KGJK-së dhe Franciska Zhitija Ymerit, duke lënë në fuqi vendimin e Gjykatës Themelore në Prishtinë në rastin e Mejreme Memajt.
Themelorja kishte anuluar raundin e dytë të votimit dhe kishte konstatuar se në raundin e parë Mejreme Memaj dhe Rrustem Thaçi kishin marrë votat e nevojshme për t’u zgjedhur anëtarë të KGJK-së nga Gjykata Supreme.
Apeli ka vlerësuar se nuk kishte bazë ligjore që rezultati i raundit të parë të zëvendësohej me një raund të dytë.
Prishtinë – Shtetasja e Kolumbisë lëndon një person dhe dëmton pronë
Një shtetase e Kolumbisë dyshohet se ka lënduar një person dhe ka dëmtuar pronë në rrugën “Ukshin Kovaçica” në Prishtinë.
Sipas Sinjalit, gruaja dyshohet se ka hedhur gurë nga ballkoni dhe më pas ka drejtuar thikën ndaj policëve. Njësia Speciale ka intervenuar dhe e ka arrestuar Catalina Henaon.
Thika është sekuestruar, ndërsa Henao është ndaluar për 48 orë për “Lëndim të lehtë trupor” dhe “Asgjësim apo dëmtim të pasurisë”.
Zubin Potok – 18-vjeçari pëson frakturë të dyfishtë në nofull pas rrahjes
Një 18-vjeçar, Andrija Radosavljević, ka pësuar frakturë të dyfishtë në nofull pas një rrahjeje në Zubin Potok.
Për rastin janë arrestuar katër persona, një i rritur dhe tre të mitur. I dyshuari madhor është ndaluar për 48 orë për “Lëndim të rëndë trupor”, ndërsa të miturit janë liruar dhe rasti ndaj tyre është iniciuar për “Pjesëmarrje në rrahje”.
Pejë – Gruaja pëson frakturë në hundë pas dhunës nga bashkëshorti
Një grua në Novosellë të Pejës ka pësuar frakturë në hundë dhe lëndime në kokë e fytyrë, pasi dyshohet se u sulmua nga bashkëshorti.
Sipas deklarimit të saj, ajo ishte goditur, kapur për fyti dhe tentuar të ngulfatej, ndërsa në raste të mëhershme i dyshuari dyshohet se ia kishte drejtuar armën.
I dyshuari është në arrati, ndërsa rasti po hetohet për “Lëndim të rëndë trupor” në kuadër të dhunës në familje.
Mitrovicë e Veriut – Dy të rinj sulmohen para “Eldorado”
Dy të rinj janë sulmuar nga disa persona pas mesnatës në rrugën “Ivo Lola Ribar”.
Njëri prej tyre ka pësuar lëndime në kokë dhe këmbë dhe është trajtuar në spital. Rasti është iniciuar si “Lëndim i lehtë trupor”, ndërsa të dyshuarit ende nuk janë identifikuar.
Graçanicë – Punëtori denoncon sulmin dhe kërcënimin me armë
Një punëtor i firmës “Elko” në Llapnasellë ka raportuar se është sulmuar dhe kërcënuar me armë pas një konflikti për fatura dhe para.
Policia ka sekuestruar një pistoletë Beretta, karikator dhe municion. Alban Gashi, Ahmet Gashi dhe Enes Gashi janë shoqëruar për intervistim.
Rasti po hetohet për “Kanosje me armë”, “Mbajtje të paautorizuar të armës” dhe “Sulm”.
Prizren – Përleshja në Ortakoll përfundon me të shtëna, ndalohen tre persona
Një përleshje në lagjen Ortakoll ka përfunduar me të shtëna, ndërsa Demokrat Morina ka mbetur i plagosur në dorë.
Sipas Sinjalit, përleshja nisi pas një mosmarrëveshjeje mes Morinës dhe Bekim Mollakuqës. Në rast u përfshi edhe Roland Mollakuqa.
Të tre janë ndaluar për 48 orë. Policia ka sekuestruar armën, një gëzhojë, karikatorin dhe tetë fishekë.
Prizren – Këta janë tre të ndaluarit pas incidentit me armë në Ortakoll
Sinjali ka mësuar identitetin e tre personave të ndaluar pas incidentit me armë në Ortakoll.
Bëhet fjalë për Demokrat Morinën, Bekim Mollakuqën dhe Roland Mollakuqën, të cilët janë ndaluar për 48 orë.
Rasti po hetohet për “Shkaktim të rrezikut të përgjithshëm” dhe “Mbajtje në pronësi, kontroll ose posedim të paautorizuar të armëve”.
Prishtinë – Vidhet pistoleta 1 mijë e 900 eurosh nga banesa
Një pistoletë Beretta 9 mm, në vlerë rreth 1 mijë e 900 euro, është vjedhur nga një banesë në kompleksin “Prime City” në Prishtinë.
Një dëshmitar ka parë dy persona të maskuar duke u larguar nga ballkoni me shkallë.
Rasti është iniciuar si “Vjedhje e rëndë”, ndërsa të dyshuarit ende nuk janë identifikuar.
Gjilan – Dy persona sulmojnë policin jashtë detyrës pas përplasjes në komunikacion
Një zyrtar policor jashtë detyrës është sulmuar fizikisht në Gjilan pas një përplasjeje në komunikacion.
Sipas Sinjalit, dy persona në një veturë dyshohet se nuk i kanë dhënë përparësi policit, ndërsa pas përplasjes verbale e kanë sulmuar fizikisht.
Polici ka pësuar lëndime të lehta, ndërsa të dyshuarit janë larguar. Rasti po hetohet për “Lëndim të lehtë trupor”.
Han i Elezit – Kapet me urdhëresë aktive, dërgohet në vuajtje të dënimit
Levent Abazi është ndaluar në Han të Elezit pasi ndaj tij kishte urdhëresë aktive nga Gjykata Themelore në Prishtinë.
Ai duhej të dërgohej në vuajtje të dënimit për veprën “Shmangia nga pagesat e tarifave të detyrueshme doganore ose akcizore”.
Pas ndalimit, Abazi është dërguar për vuajtjen e dënimit.
Nata në Kosovë
Dhjetëra raste, arrestime, dhunë, armë, përleshje dhe vjedhje.
SINJALI 24 – Kur ti flije, ne e përcollëm Kosovën.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
Sinjali – aty ku e vërteta flet para lajmit!
