Real Madridi është shumë pranë marrëveshjes për transferimin e përhershëm të sulmuesit të akademisë, Jacobo Ortega, te skuadra franceze Strasbourg, në një operacion që pritet të kapë vlerën e rreth 10 milionë eurove.
“Los Blancos” do të mbajnë 30 për qind të të drejtave ekonomike të lojtarit, çka do t’u siguronte një përfitim të rëndësishëm në rast se Ortega shitet sërish në të ardhmen. Marrëveshja pritet të përmbajë edhe një opsion që do t’i mundësonte klubit madrilen ta rikthente sulmuesin për një shumë më të ulët.
Nëse transferimi mbyllet për 10 milionë euro, Ortega do të hyjë në histori si lojtari i akademisë së Real Madridit që është shitur për shumën më të lartë pa zhvilluar asnjë ndeshje me ekipin e parë.
Sulmuesi pritet të jetë pjesë e valës së lojtarëve të akademisë që këtë verë kanë zgjedhur të largohen nga Madridi për të gjetur më shumë hapësira në ekipet e para. Mes tyre janë edhe Gonzalo Garcia, Cesar Palacios dhe Mario Martin.
Strasbourg e sheh Ortegën si një përforcim të rëndësishëm për repartin ofensiv, veçanërisht pas largimit të Emmanuel Emeghas drejt Chelseat.
Në klubin francez, qendërsulmuesi do të ketë konkurrencë për pozitën e titullarit nga Joaquin Panichelli, Sekou Mara dhe Milos Lukovic, ndërsa skuadra drejtohet nga trajneri Hugo Oliveira.
Për shërbimet e Ortegës ka pasur interesim edhe nga Elche, e cila raportohet se është futur në garë në fazën e fundit të negociatave.
Megjithatë, Strasbourg mbetet aktualisht destinacioni më i mundshëm për sulmuesin, i cili mund të largohet nga akademia e Real Madridit për një shumë rekord.
Sinjali – aty ku e vërteta flet para lajmit!
