Në Milano të Italisë është organizuar një protestë nga anëtarë të komunitetit shqiptar në veri të vendit dhe aktivistë mjedisorë, të cilët kanë shprehur kundërshtimin e tyre ndaj një projekti të planifikuar në zonat e mbrojtura në lagunën e Nartës dhe në deltën e lumit Vjosa në Shqipëri.
Protestuesit theksuan se këto zona natyrore janë të rrezikuara nga zhvillimet e parashikuara për turizëm luksoz, duke kërkuar mbrojtjen e tyre dhe ndalimin e ndërhyrjeve ndërtimore në hapësira të ndjeshme ekologjike.
Me pankarta dhe slogane si “Shqipëria nuk është në shitje”, pjesëmarrësit shprehën shqetësimin e tyre për ndikimin që, sipas tyre, projekti mund të ketë në mjedis dhe në ekosistemet lokale.
Lëvizja kundër projektit në Zvërnec ka nisur fillimisht në Shqipëri dhe më pas është zgjeruar edhe në diasporë, duke u shndërruar në një nga reagimet më të mëdha mjedisore të viteve të fundit.
Ndërkohë, autoritetet shqiptare kanë deklaruar se projekti synon zhvillimin e turizmit dhe rritjen e potencialit ekonomik të zonës, duke e cilësuar atë si një investim të rëndësishëm strategjik për vendin.
Sinjali – aty ku e vërteta flet para lajmit!
