Trajneri i Manchester Cityt, Enzo Maresca, ka bërë të ditur se klubi do të tentojë të gjejë një zëvendësues të denjë për Rodrin, pasi mesfushori spanjoll u largua nga “Etihad” për t’iu bashkuar Barcelonës.
Rodri, i cili kaloi shtatë sezone te Manchester City, u transferua te kampioni i La Ligës për rreth 65 milionë funte dhe ka nënshkruar kontratë katërvjeçare me klubin katalanas.
30-vjeçari u shndërrua në një prej mesfushorëve më të mirë në botë gjatë periudhës së tij në Angli, duke fituar Topin e Artë në vitin 2024, katër tituj të Premier League dhe Ligën e Kampionëve.
“Do të përpiqemi të gjejmë Rodrin e ri. Para se Rodri të vinte këtu, ai nuk e kishte fituar Topin e Artë, Ligën e Kampionëve apo Kupën e Botës për Klube. Erdhi këtu dhe arriti shumë gjëra të rëndësishme”, deklaroi Maresca.
Trajneri italian kujtoi edhe mënyrën se si City kishte zëvendësuar më herët yjet e larguar, duke përmendur kalimet nga David Silva te Kevin De Bruyne, nga Sergio Aguero te Erling Haaland dhe nga Fernandinho te Rodri.
Sipas tij, sfida e klubit është që edhe këtë herë të bëjë zgjedhjen e duhur në merkato.
City tashmë ka transferuar Elliot Anderson nga Nottingham Forest për 115 milionë funte dhe raportohet se është në bisedime të avancuara për Ayyoub Bouaddi të Lille.
Në listën e lojtarëve që po monitorohen thuhet se janë edhe Enzo Fernandez, Alex Scott dhe Alexis Mac Allister.
Ndërkohë, klubi mund të përballet edhe me largime të tjera, pasi Tottenham ka arritur marrëveshje prej 75 milionë funtesh për Savinhon dhe po zhvillon bisedime edhe për Omar Marmoush.
Maresca pranoi se ditët e fundit të afatit kalimtar pritet të jenë intensive, duke theksuar se City nuk dëshiron të mbajë në skuadër lojtarë që kërkojnë të largohen.
Sinjali – aty ku e vërteta flet para lajmit!
