Gjermania po planifikon krijimin e një “mburoje mbrojtëse” për të parandaluar dhe luftuar përpjekjet për sabotim, pas incidentit me një dron në aeroportin Leipzig/Halle në gusht, raporton gazeta gjermane Bild.
Ministri i Brendshëm gjerman, Alexander Dobrindt, tha për Bild se sulmet hibride ruse janë bërë “realitet i përditshëm” dhe se ato pritet të shtohen, por theksoi se Gjermania ka mundësi për t’u mbrojtur.
Sipas planit të ri, do të krijohet një “Cyberdome”, një rrjet sensorësh digjitalë që do të ndihmojë në zbulimin dhe pengimin e përpjekjeve për sulme kibernetike.
Gjermania planifikon gjithashtu të zgjerojë kapacitetet e policisë për mbrojtjen nga dronët. Njësi të lëvizshme, të afta për t’u dislokuar me shpejtësi, pritet të vendosen në qytete të mëdha si Berlini, Mynihu dhe Hamburgu, me qëllim mbrojtjen e hapësirës ajrore mbi qendrat kryesore të transportit.
Plani parasheh edhe përdorim më të gjerë të inteligjencës artificiale dhe teknologjisë së njohjes së fytyrës për identifikimin e personave të dyshuar për sulme. Ndërkohë, kompanive do t’u jepet e drejta për të zbuluar dronët dhe për të ndërmarrë masa aktive kundër tyre.
Çfarë ndodhi në Leipzig?
Masa e re vjen pas incidentit të 4 gushtit, kur një dron i pajisur me eksplozivë u gjet në aeroportin Leipzig/Halle, një prej qendrave të rëndësishme të transportit të mallrave në Gjermani.
Pas incidentit, pistat e aeroportit u mbyllën përkohësisht, ndërsa disa fluturime u devijuan.
Qeveria gjermane më pas e akuzoi zyrtarisht Rusinë për sulmin e dyshuar. Ministri i Jashtëm Johann Wadephul njoftoi masa ndaj Moskës, përfshirë mbylljen e konsullatës së Rusisë në Bon dhe të qendrës kulturore ruse në Berlin.
Rusia i ka mohuar akuzat, duke i cilësuar ato si “të pabazuara” dhe “absurde”. Ambasadori rus në Gjermani, Sergey Nechayev, paralajmëroi se masat gjermane përfaqësojnë një përshkallëzim të paprecedentë të marrëdhënieve mes dy vendeve dhe se “nuk do të mbeten pa pasoja”.
Ndërkohë, presidentja e Komisionit Evropian, Ursula von der Leyen, ka shprehur “solidaritet të plotë” me Gjermaninë, duke thënë se sulmi i dyshuar ishte kryer me materiale të nivelit ushtarak dhe nga operativë rusë në territorin e Bashkimit Evropian.
Sinjali – aty ku e vërteta flet para lajmit!
