Pesë turistë suedezë kanë rrezikuar të mbyteshin në det në Ksamil, pasi mjeti lundrues me të cilin po lundronin pësoi probleme dhe mbeti në vështirësi.
Sipas njoftimit të Policisë në Shqipëri, ngjarja ka ndodhur gjatë patrullimit në hapësirën detare të Ksamilit, ku shërbimet e Policisë Kufitare dhe Njësisë Policore Detare konstatuan turistët duke kërkuar ndihmë.
Mjeti lundrues, tip pedalon, ndodhej në vështirësi dhe ekzistonte rreziku që pesë turistët të përfundonin në det.
Shërbimet policore ndërhynë menjëherë, duke iu dhënë ndihmën e nevojshme, ndërsa pedalonin e tërhoqën dhe e shoqëruan drejt bregut.
Të pesë turistët u nxorën në breg në mënyrë të sigurt dhe, fatmirësisht, rezultojnë në gjendje të mirë shëndetësore.
Pas shpëtimit, turistët suedezë falënderuan punonjësit e Policisë Kufitare dhe Njësisë Policore Detare për ndërhyrjen në kohë dhe ndihmën e dhënë.
Policia Kufitare dhe Njësia Policore Detare vijojnë patrullimet në hapësirat detare, veçanërisht gjatë sezonit turistik, me qëllim garantimin e sigurisë së qytetarëve dhe turistëve.
Sinjali – aty ku e vërteta flet para lajmit!
