Të paktën 14 sulme janë raportuar gjatë mbrëmjes në katër provinca të Bregut Perëndimor të pushtuar, ku, sipas një organi zyrtar palestinez, janë vjedhur rreth 300 dele dhe është ndërprerë një linjë kryesore e ujit që furnizon qindra palestinezë.
Komisioni Palestinez për Rezistencën ndaj Kolonizimit dhe Murit tha se sulmet janë regjistruar në provincat Ramallah dhe Al-Bireh, Hebron, Nablus dhe Betlehem, raporton anadolu.
Sipas komisionit, gjashtë incidente janë raportuar në Ramallah dhe Al-Bireh, nga tre në Hebron dhe Nablus dhe dy në Betlehem.
Në Al-Mughayyir, në provincën Ramallah dhe Al-Bireh, komisioni tha se forcat izraelite hapën zjarr drejt shtëpive palestineze, sulmuan banorët me sprej piperi dhe dëmtuan një ambulancë. Po ashtu, raportohet se një palestinez u sulmua dhe u vodhën prodhime ulliri, ndërsa rreth 300 dele u morën nga zona Al-Hayyan në Deir Dibwan.
Në Hebron, sipas të njëjtit burim, u ndërpre linja kryesore e ujit që furnizon fshatin Ad-Duqaiqa në zonën Yatta, duke lënë rreth 700 palestinezë pa ujë. Po ashtu, një objekt bujqësor u dogj dhe një familje në Khallat al-Hummus u detyrua të zhvendoste tendën e saj.
Në Nablus, komisioni raportoi lëvizje mes shtëpive palestineze në Al-Lubban ash-Sharqiya dhe vjedhje të pajisjeve nga një tokë në pronësi të banorëve të An-Naqura.
Ndërsa në Betlehem, sipas raportimit, barinjtë në Za’atara u ndoqën dhe bagëtitë u lëshuan në toka në pronësi palestineze.
Komisioni tha se gjatë muajit gusht janë regjistruar gjithsej 628 sulme në Bregun Perëndimor të pushtuar, përfshirë Kudsin Lindor.
Ndërkohë, në muajin gusht, ambasadori amerikan në Izrael, Mike Huckabee, i kishte cilësuar si “terroristë” izraelitët e përfshirë në sulme të dhunshme ndaj palestinezëve në Bregun Perëndimor, duke paralajmëruar për pasojat e tyre.
Në qershor, 14 raportues të posaçëm të OKB-së paralajmëruan për rritjen e dhunës së kolonëve dhe ndikimin e saj në komunitetet palestineze.
Të dhënat e cituara nga komisioni palestinez thonë se rreth 750 mijë kolonë izraelitë jetojnë në 156 vendbanime dhe 360 pika të avancuara në Bregun Perëndimor të pushtuar, përfshirë Kudsin Lindor.
Sinjali – aty ku e vërteta flet para lajmit!
