Shumë automjete moderne nuk kanë gomë rezervë, ndërsa në disa raste hapësira e saj përdoret për rezervuarin e gazit. Për këtë arsye, shumë shoferë mbajnë në veturë sete për riparimin e gomave.
Megjithatë, ekspertët paralajmërojnë se edhe këto sete kanë afat përdorimi. Data e skadimit zakonisht shënohet në paketim dhe, pas kalimit të saj, seti duhet të zëvendësohet dhe të hidhet në mënyrë të përshtatshme.
Nëse automjeti ka hapësirë të lirë, ekspertët rekomandojnë që shoferët të kenë një gomë rezervë, së bashku me çelësin dhe krikun.
Seti për riparimin e gomës mund të jetë i dobishëm, por duhet të konsiderohet vetëm si zgjidhje e përkohshme. Pas përdorimit, rekomandohet që automjeti të dërgohet në servisin më të afërt të gomave për kontroll.
Kjo metodë mund të funksionojë vetëm për dëmtime të vogla. Në rast të një çarje të madhe, seti nuk është i mjaftueshëm dhe automjeti duhet të transportohet deri te servisi për zëvendësimin e gomës.
Gjithashtu, riparimi i gomave të vjetra nuk rekomandohet. Prodhuesit zakonisht nuk e këshillojnë një ndërhyrje të tillë dhe nuk japin garanci për sigurinë e saj, ndërsa arnimi shihet vetëm si zgjidhje e përkohshme.
Sinjali – aty ku e vërteta flet para lajmit!
