Banka Qendrore e Kosovës ka ndërmarrë masa ndaj kompanisë së sigurimeve “Eurosig Kosova”, duke shkarkuar ushtruesin e detyrës së kryeshefit ekzekutiv dhe katër anëtarë të bordit të kompanisë.
Vendimi i rregullatorit vjen pas shqyrtimeve lidhur me mënyrën e menaxhimit të rreziqeve dhe çështjet që kanë të bëjnë me risigurimin dhe mbulimin financiar të kompanisë.
“Eurosig Kosova” ka konfirmuar se e ka pranuar vendimin e BQK-së dhe ka bërë të ditur se ndërkohë ka caktuar një kryetar të ri të bordit dhe një ushtrues të detyrës së kryeshefit ekzekutiv.
Sipas kompanisë, vendimi i BQK-së nuk ka ndikuar në funksionimin e saj dhe aktivitetet po vazhdojnë normalisht.
Në kuadër të procesit, kompania ka deklaruar se ka paraqitur përgjigjet e saj lidhur me gjetjet e evidentuara gjatë ekzaminimit dhe se është duke i zbatuar vendimet e rregullatorit.
Nga ana tjetër, çështja lidhet me strukturën e pronësisë së “Eurosig Kosova”, e cila është në pronësi të plotë të shoqërisë “Eurosig” sh.a., me seli në Shqipëri.
Sipas të dhënave publike të regjistrit të pronarëve përfitues në Shqipëri, biznesmeni Kadri Morina figuron si një nga pronarët kryesorë përfitues të kompanisë mëmë.
Masa e ndërmarrë nga BQK-ja ka nxitur vëmendje për mënyrën se si janë menaxhuar rreziqet financiare dhe kërkesat për risigurim në aktivitetin e kompanisë në Kosovë.
Ndërkohë, BQK-ja deri më tani nuk ka dhënë një sqarim të detajuar publik mbi arsyet specifike që kanë çuar në shkarkimin e drejtuesve të “Eurosig Kosova”.
Rregullatori pritet të japë më shumë detaje lidhur me gjetjet dhe masat e ndërmarra ndaj kompanisë.
Sinjali – aty ku e vërteta flet para lajmit!
The post Në Shqipëri i fuqishëm, në Kosovë ndeshet me BQK-në: Shkarkohet bordi i “Eurosig” appeared first on Sinjali.
