Shtëpia e Bardhë ka publikuar raportin mjekësor të presidentit Donald Trump pas një kontrolli të fundit në Qendrën Mjekësore Ushtarake Walter Reed, ku mjeku i tij ka rekomanduar ndryshime në stilin e jetesës, përfshirë humbje peshe dhe rritje të aktivitetit fizik, pavarësisht se e ka vlerësuar gjendjen e tij shëndetësore si të shkëlqyer.
Sipas raportit të publikuar, mjeku i Shtëpisë së Bardhë, Dr. Sean Barbabella, thekson se presidenti demonstron funksion të mirë kardiak, pulmonar dhe neurologjik, duke e cilësuar atë “plotësisht të aftë” për të kryer detyrat e tij si Komandant i Përgjithshëm.
“Presidenti Trump mbetet në shëndet të shkëlqyer… performanca njohëse dhe fizike është e shkëlqyer,” thuhet në raport.
Megjithatë, në të njëjtën kohë, mjeku ka këshilluar masa parandaluese, përfshirë rregullime në dietë, rritje të aktivitetit fizik, si dhe humbje të vazhdueshme peshe. Raporti thekson gjithashtu përdorimin e dozës së ulët të aspirinës si pjesë e trajtimit të tij parandalues.
Sipas të dhënave zyrtare, Trump është rreth 1.83 metra i gjatë dhe peshon rreth 100 kilogramë. Në raport përmendet edhe prania e një ënjtjeje të lehtë në këmbët e poshtme, e cila sipas mjekëve ka shënuar përmirësim krahasuar me vitin e kaluar.
Ekzaminimi përfshiu edhe një vlerësim neurologjik dhe kognitiv, ku presidenti ka marrë rezultat maksimal, ndërsa mjekët nuk kanë konstatuar probleme në kujtesë, reflekse apo ekuilibër.
Raporti vjen në një kohë kur shëndeti i presidentit ka qenë shpesh objekt diskutimi publik, ndërsa Shtëpia e Bardhë ka theksuar se të gjitha kontrollet e fundit tregojnë stabilitet të përgjithshëm dhe aftësi të plotë për ushtrimin e detyrës.
Sinjali – aty ku e vërteta flet para lajmit!
