Rusia ka akuzuar Mbretërinë e Bashkuar se po e përshkallëzon luftën në Ukrainë, pas vendimit të Londrës për t’i ofruar Kievit informacion të klasifikuar lidhur me komponentët britanikë që përdoren në raketat me rreze të gjatë veprimi “Scalp”.
Zëdhënësi i Kremlinit, Dmitry Peskov, ka deklaruar se mbështetja e re britanike për Ukrainën po e vështirëson procesin e paqes.
“Britania po i hedh benzinë zjarrit në mënyrë metodike dhe të rregullt dhe po komploton në mënyrë metodike dhe të rregullt për të parandaluar çdo përparim në procesin e paqes”, ka thënë Peskov.
Duke komentuar vizitën e kryeministrit britanik Andy Burnham në Kiev dhe mbështetjen e re ushtarake për Ukrainën, Peskov ka pretenduar se Britania po merr pjesë drejtpërdrejt në luftë në anën e Ukrainës.
Ai ka paralajmëruar gjithashtu se ushtria ruse po mbledh të dhëna për të identifikuar objektet ku prodhohen raketat, duke lënë të hapur mundësinë që ato të bëhen objektiv i sulmeve ruse.
Deklaratat e Moskës vijnë në një kohë kur Britania ka rritur mbështetjen ushtarake për Ukrainën, ndërsa Kievi po kërkon forcimin e kapaciteteve të tij mbrojtëse dhe të sulmeve me rreze të gjatë veprimi.
Sinjali – aty ku e vërteta flet para lajmit!
