Në një intervistë ekskluzive për emisionin “Ora Shtatë” në Klan Kosova, presidentja e vendit, Vjosa Osmani, ndau kujtime personale nga fëmijëria e saj, duke folur për sfidat e asaj kohe dhe festat simbolike të fundvitit.
“Përkundër rrethanave të vështira që ka kaluar familja jonë dhe populli, si fëmijë shumë herët na është dashur të përballemi me sfidat e krijuara nga jeta”.
“Për shkak të dëbimit nga puna të prindërve, edhe ne u dëbuam nga shkolla, dhe kështu na u desh të rriteshim para kohe”, tha Osmani, duke reflektuar mbi vështirësitë që e formësuan jetën e saj, transmeton Klankosova.tv.
Ajo shtoi se këto përvoja e bënë më të fortë: “Kjo na ka bërë më të fuqishëm, më të durueshëm për t’u përballur me sfidat e sotme”.
Presidentja kujtoi njëherësh me ngrohtësi festat e fundvitit në banesën e familjes në Mitrovicë.
“Festat e vitit të ri ishin përplot hare, me atë pak ushqim që kishim. Ndonjë dhuratë simbolike e vogël për ne si fëmijë, muzikë, vallëzim, dhe një atmosferë që nuk ndalej kurrë,” u shpreh ajo.
Osmani theksoi po ashtu rëndësinë e ruajtjes së këtyre traditave dhe krijimit të momenteve të veçanta për fëmijët e sotëm.
“Çdo vit të ri e kalojmë bashkë me familjen, duke krijuar kujtime që edhe fëmijët tanë do t’i bartin për gjithë jetën e tyre”, u shpreh e para e vendit./Klankosova.tv.
Ky rrëfim sjell një pasqyrë të ngrohtë dhe personale të jetës së presidentes, për të dëgjuar intervisten e plotë, ndiqeni videon më poshtë:
*Klikoni KËTU për t´u bërë pjesë e kanalit zyrtar të Klan Kosovës në Viber.
*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.
<!–
–>
