Presidenti i FIFA-s, Gianni Infantino, ka nisur të sigurojë mbështetje për të qëndruar në krye të institucionit edhe pas zgjedhjeve të planifikuara për marsin e vitit të ardhshëm.
Pozita e tij ishte vënë në pikëpyetje pasi propozoi shitjen e një pjese të të drejtave të Kupës së Botës te investitorë privatë, ide që shkaktoi reagime të forta dhe kërkesa për dorëheqjen e tij. Pas presionit, Infantino e tërhoqi propozimin.
Megjithatë, pas një takimi krize në Marok, FIFA bëri të ditur se Infantino ka marrë mbështetje të plotë, ndërsa ai u ka kërkuar falje anëtarëve për propozimin e kontestuar.
Mbështetjen më të fuqishme deri tani ia ka dhënë Konfederata Afrikane e Futbollit, e cila përfaqëson 54 federata dhe ka njoftuar se anëtarët e saj e mbështesin unanimisht Infantinon.
Në krah të tij kanë dalë edhe Federata e Futbollit e Meksikës dhe ajo e Argjentinës, duke i dhënë një shtysë të rëndësishme kandidaturës së tij për një tjetër mandat.
Federata Argjentinase ka vlerësuar periudhën dhjetëvjeçare të Infantinos në drejtimin e FIFA-s, duke theksuar se vazhdimi nën udhëheqjen e tij është rruga e duhur përpara.
Infantino tani po synon të zgjerojë mbështetjen edhe në konfederatat e tjera, ndërsa gara për drejtimin e FIFA-s pritet të intensifikohet në muajt e ardhshëm.
Sinjali – aty ku e vërteta flet para lajmit!
