Detaje të tjera bëhen me dije në lidhje me vrasjen e ndodhur të shtunën në Tiranë, ku 68-vjeçari Hysni Patushi goditi me thikë bashkëshorten e tij, Lumturie Patushi.
Panorama.com raporton se ka qenë nipi 14-vjeçar që ka njoftuar policinë për ngjarjen e rëndë. “Gjyshja ka vdekur”, mësohet të ketë thënë 14-vjeçari, që bashkë me të vëllain 8-vjeçar, panë momentin kur gjyshi i tyre vrau gjyshen para syve.
14-vjeçari iu tha hetuesve se Hysni Patushi e goditi bashkëshorten pas një debati të ashpër mes tyre. Pas krimit, Hysni Patushi është larguar me shpejtësi dhe 200 metra larg pallatit ka hedhur thikën,me të cilën kreu krimin.
68-vjeçari u strehua tek një i afërm i tij në Kamzë. Ishte kushëriri që lajmëroi policinë se autori i vrasjes ndodhej në banesën e tij dhe policia e vuri në pranga.
NGJARJA
Ngjarja e rëndë ndodhi paraditen e së shtunës, 19 shtator, ndërsa krimi u krye në sy të dy nipërve të mitur të çiftit dhe dhëndrit të tyre, të cilët ndodheshin në banesë në momentin e ngjarjes. Lumturie Patushi u godit me mjet prerës dhe, pavarësisht ndërhyrjes, humbi jetën si pasojë e plagëve të marra. Ende nuk dihen motivet e ngjarjes, por dy bashkëshortët kishin pasur probleme më herët.
Sinjali – aty ku e vërteta flet para lajmit!
