Gazetari britanik i The Economist dhe njohësi i zhvillimeve në Ballkan, Tim Judah, ka ngritur pikëpyetje për ndikimin që Franca mund të ketë në procesin e zgjerimit të Bashkimit Evropian me vendet e Ballkanit Perëndimor.
Përmes një postimi në rrjetin social “X”, Judah ka shpërndarë një artikull të The Economist që trajton perspektivën e Malit të Zi për t’u bërë vendi i radhës që i bashkohet BE-së.
“Shumë njerëz në Ballkanin Perëndimor duket se nuk e kanë kuptuar se sa i madh është problemi që paraqet Franca për ta kur bëhet fjalë për anëtarësimin në BE”, ka shkruar ai.
Në artikull rikujtohet edhe një shprehje ironike që përdoret në rajon për procesin e gjatë të integrimit evropian: vendet kandidate pretendojnë se po kryejnë reformat, ndërsa BE-ja pretendon se dëshiron t’i pranojë.
Megjithatë, lufta e nisur nga Rusia në Ukrainë në vitin 2022 ka ndryshuar dinamikën e zgjerimit të BE-së dhe i ka dhënë procesit një shtysë të re.
Në këtë kuadër, Mali i Zi shihet si një nga kandidatët me mundësi reale për të avancuar drejt anëtarësimit. Me rreth 630 mijë banorë, vendi do të kishte një kosto relativisht të ulët për BE-në sa i përket ndihmës financiare.
Po ashtu, eksportet e kufizuara bujqësore të Malit të Zi nuk konsiderohen kërcënim i madh për fermerët evropianë, ndërsa madhësia e vendit nuk pritet të shkaktojë një valë të konsiderueshme të migrimit të fuqisë punëtore.
Por, sipas vërejtjes së Judah-it, rruga drejt BE-së nuk varet vetëm nga reformat që duhet t’i zbatojnë vendet kandidate. Qëndrimi i shteteve anëtare, veçanërisht i Francës, mund të luajë një rol të rëndësishëm në përcaktimin e ritmit të zgjerimit.
Sinjali – aty ku e vërteta flet para lajmit!
