Evropa po përballet me një sfidë të madhe për të forcuar mbrojtjen e saj, ndërsa dekadat e nëninvestimit në sektorin ushtarak nuk mund të kompensohen brenda një periudhe të shkurtër. Kështu vlerëson analisti francez i mbrojtjes, Aurélien Duchêne.
Në një intervistë për radion zvicerane RTS, Duchêne tha se pushtimi rus i Ukrainës ka ndryshuar rrënjësisht qasjen e vendeve evropiane ndaj sigurisë, duke i detyruar ato të rrisin investimet dhe të përgatiten për një të ardhme me më pak mbështetje nga Shtetet e Bashkuara.
Sipas tij, vende si Gjermania, Italia dhe Spanja kanë mbetur pas për shkak të viteve të tëra me investime të pamjaftueshme në mbrojtje, ndërsa objektivi është që kapacitetet ushtarake të forcohen ndjeshëm deri në vitin 2030.
Analisti theksoi se lufta në Ukrainë ka dëshmuar rolin vendimtar të dronëve në konfliktet moderne, duke shtuar se Evropa është ende larg kapaciteteve të nevojshme për t’iu përgjigjur këtyre sfidave.
Ai kritikoi gjithashtu mungesën e koordinimit mes vendeve të Bashkimit Evropian, duke argumentuar se bashkëpunimi më i madh në projektet e mbrojtjes do të ulte kostot dhe do të rriste efikasitetin.
Sipas Duchêne, Evropa duhet të ndërtojë një strategji të përbashkët sigurie dhe të jetë e gatshme të mbrojë vlerat dhe aleatët e saj përballë kërcënimeve të mundshme.
Sinjali – aty ku e vërteta flet para lajmit!
