Një inspektim sanitar në një restorant në fshatin Keqekollë të Prishtinës dyshohet se ka përfunduar me kërcënime ndaj tre zyrtarëve që po ushtronin detyrën e tyre, mëson ekskluzivisht Sinjali.
Burimet e Sinjalit bëjnë të ditur se personi i dyshuar është Bujar Rexha, pronar i restorantit “Etno Koha”.
Rasti ka ndodhur më 8 shtator, kur tre inspektorë sanitarë kishin shkuar në restorant për të kryer një inspektim në kuadër të detyrës së tyre zyrtare.
Sipas informacioneve që ka siguruar Sinjali, gjatë inspektimit pronari i restorantit dyshohet se i ka penguar zyrtarët në kryerjen e detyrës dhe më pas i ka kanosur me fjalë.
Tre inspektorët kanë deklaruar se pas kërcënimeve janë ndier të rrezikuar dhe janë larguar nga lokacioni.
Rreth orës 13:50, ata janë paraqitur në Stacionin Policor Veriu në Prishtinë, ku kanë denoncuar rastin dhe kanë dhënë deklaratat e tyre lidhur me atë që dyshohet se kishte ndodhur gjatë inspektimit.
Për rastin është njoftuar Prokurori kujdestar, i cili ka udhëzuar Policinë që të iniciojë rastin “Kanosje ndaj personit zyrtar” dhe të sigurojë prezencën e të dyshuarit për procedurat e mëtejshme.
Rasti po trajtohet nga organet kompetente.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
Sinjali – aty ku e vërteta flet para lajmit!
