Ish-presidenti i Venezuelës, Nicolas Maduro, është paraqitur sërish para gjykatës federale në Nju Jork, në kuadër të procesit gjyqësor ku ai dhe bashkëshortja e tij, Cilia Flores, përballen me akuza për trafik droge, posedim armësh dhe vepra të tjera penale.
Kjo është seanca e tretë dëgjimore për Maduron që nga arrestimi i tij në janar. Të dy të pandehurit i kanë mohuar akuzat dhe janë deklaruar të pafajshëm për veprat me të cilat ngarkohen.
Prokuroria amerikane pretendon se Maduro ka qenë i përfshirë në një skemë të kontrabandës së kokainës drejt Shteteve të Bashkuara, në bashkëpunim me zyrtarë të tjerë venezuelas. Në rast të shpalljes fajtor, ai mund të përballet me dënim maksimal deri në burgim të përjetshëm.
Sipas dokumenteve të paraqitura në gjykatë, prokuroria dhe mbrojtja kanë propozuar që gjyqi të nisë në qershor të vitit 2027, datë që pritet të shqyrtohet nga gjyqtari përgjegjës për rastin.
Avokati i Maduros, Barry Pollack, ka paralajmëruar se do të kundërshtojë ligjshmërinë e arrestimit të tij, duke pretenduar se procedura ka qenë e paligjshme. Ndërkohë, mbrojtja ka kërkuar kohë shtesë për të trajtuar çështjet komplekse juridike.
Procesi ndaj ish-liderit venezuelas vazhdon të tërheqë vëmendje ndërkombëtare, ndërsa përkrahës dhe kundërshtarë të tij janë mbledhur pranë gjykatës në Nju Jork.
Sinjali – aty ku e vërteta flet para lajmit!
