Arabia Saudite ka kufizuar eksportet e naftës drejt Evropës, pasi sulmet me dronë dëmtuan tubacionin kryesor Lindje-Perëndim, përmes të cilit nafta e papërpunuar transportohet drejt Detit të Kuq.
Saudi Aramco u ka njoftuar klientëve evropianë se disa ngarkesa të naftës bruto, të planifikuara për t’u ngarkuar gjatë shtatorit, do të anulohen, ndërsa dërgesat nga porti i Yanbusë janë pezulluar, raportoi Reuters, duke cituar burime të afërta me zhvillimet.
Autoritetet saudite kanë fajësuar milicitë irakiane për sulmet ndaj infrastrukturës së naftës.
Tubacioni Lindje-Perëndim i ka mundësuar Arabisë Saudite të zbusë ndikimin e mbylljes së Ngushticës së Hormuzit gjatë gjashtë muajve të fundit. Pas dëmtimit të tij, Riadi pritet të përpiqet të rrisë eksportet përmes Hormuzit, duke përdorur të ashtuquajturat “dërgesa të errëta”, një praktikë që tashmë po përdoret nga Emiratet e Bashkuara Arabe dhe Iraku.
Zhvillimi ka shkaktuar reagim të menjëhershëm te klientët kryesorë evropianë të Aramco-s, ndërsa çmimet e ngarkesave të naftës kanë tejkaluar 120 dollarë për fuçi.
Kompania polake Orlen, e cila siguron rreth 40 për qind të naftës së saj nga Arabia Saudite, ka nisur të kërkojë ngarkesa alternative nga Deti i Veriut dhe tregje të tjera.
Megjithatë, kompania ka bërë të ditur se, për momentin, furnizimet për rafineritë e saj në Poloni, Lituani dhe Republikën Çeke po vazhdojnë pa ndërprerje.
Sinjali – aty ku e vërteta flet para lajmit!
