Për personat që synojnë të shtojnë në peshë, zgjedhja e ushqimeve të pasura me kalori dhe lëndë ushqyese mund të jetë një mënyrë e mirë për të rritur marrjen ditore të energjisë, pa pasur nevojë për porcione shumë të mëdha.
Dietologia Caitlin Beale rekomandon që ushqimet e lehta të përmbajnë jo vetëm kalori, por edhe proteina, fibra, yndyra të shëndetshme, vitamina dhe minerale.
Ndër ushqimet që mund të përfshihen gjatë ditës janë:
1. Kosi grek me yndyrë të plotë -Përmban proteina, kalcium dhe probiotikë, ndërsa mund të kombinohet me fruta, fara, granola ose gjalpë arrash për të rritur vlerën kalorike.
2. Gjalpi i kikirikut – Është i pasur me proteina dhe yndyra të pangopura dhe mund të shtohet lehtësisht në bukë, fruta ose smoothie.
3. Avokadoja – E pasur me yndyra të shëndetshme, fibra dhe mikronutrientë, avokadoja mund të kombinohet me bukë integrale për një vakt të lehtë dhe ushqyes.
4. Gjiza – Është burim i mirë proteinash dhe, veçanërisht në variantet me më shumë yndyrë, mund të ndihmojë në rritjen e kalorive ditore. Mund të konsumohet me fruta, mjaltë ose perime.
5. Arrat dhe frutat e thata – Bajamet, arrat, fistikët, farat dhe frutat e thata janë të pasura me energji dhe mund të konsumohen lehtësisht si mesvakt.
6. Kefiri – Kjo pije e fermentuar me bazë qumështi mund të ofrojë proteina, kalori dhe probiotikë. Variantet me më shumë yndyrë mund të jenë më të përshtatshme për personat që synojnë të rrisin marrjen e kalorive.
7. Humusi – I përgatitur kryesisht nga qiqrat dhe tahini, humusi përmban proteina bimore, fibra dhe yndyra të shëndetshme. Mund të shoqërohet me perime, bukë ose pite.
8. Gjalpi i bajameve – Është një ushqim me përmbajtje të lartë kalorike, ndërsa ofron edhe proteina, fibra dhe yndyra të shëndetshme. Mund të përdoret me fruta ose mbi bukë të thekur.
Konsumimi i mesvakteve të tilla çdo disa orë mund të ndihmojë në rritjen graduale të kalorive gjatë ditës, pa shkaktuar domosdoshmërisht ndjesinë e ngopjes së tepërt.
Për një shtim më të shëndetshëm në peshë, rekomandohet që fokusi të jetë te ushqimet me vlera ushqyese dhe jo vetëm te produktet me shumë kalori.
Sinjali – aty ku e vërteta flet para lajmit!
