Të paktën dy persona kanë humbur jetën dhe një tjetër është plagosur pas një shkëmbimi zjarri që shpërtheu mes dy grupeve të rinjsh në një qendër tregtare në Dearborn të Michiganit, duke shkaktuar panik të madh mes qindra klientëve.
Ngjarja ndodhi në Qendrën e Qytetit Fairlane, në një moment kur në SHBA kishin nisur festimet e 4 Korrikut, periudhë që shpesh shoqërohet me rritje të incidenteve me armë në vend.
Sipas Arkivit të Dhunës me Armët, vetëm në vitin 2024 janë raportuar mbi 500 të shtëna gjatë fundjavës së Ditës së Pavarësisë, duke e bërë këtë periudhë një nga më problematiket për sigurinë publike.
Të shtënat shkaktuan kaos brenda dhe jashtë qendrës tregtare, ku njerëzit u panikuan dhe filluan të largoheshin me vrap për të shpëtuar, ndërsa një person u godit nga një automjet gjatë përpjekjes për t’u larguar nga vendi i ngjarjes.
Një nga viktimat ka vdekur në vendin e ngjarjes brenda qendrës tregtare, ndërsa tjetri në një spital aty pranë. Gjendja e personit të tretë të plagosur nuk është bërë ende e ditur.
Pas incidentit, qendra tregtare është evakuuar dhe autoritetet kanë nisur hetimet, duke e mbajtur objektin të mbyllur. Në rrjete sociale janë publikuar pamje që tregojnë momentet e panikut kur qytetarët largohen me shpejtësi pas të shtënave.
Sinjali – aty ku e vërteta flet para lajmit!
