Shtetet e Bashkuara kanë hequr Sirinë nga lista e shteteve sponsorizuese të terrorizmit, 47 vjet pasi vendi ishte përfshirë në këtë listë. Vendimi i administratës së presidentit Donald Trump synon të lehtësojë investimet dhe të ndihmojë riintegrimin e Sirisë në ekonominë globale.
Sekretari amerikan i Shtetit, Marco Rubio, tha se vendimi pasqyron hapat e ndërmarrë nga qeveria e re siriane për t’u distancuar nga terrorizmi ndërkombëtar.
Masa përbën një ndryshim të rëndësishëm në politikën e Washingtonit ndaj Damaskut, ndërsa administrata Trump ka ndërmarrë hapa për afrimin e marrëdhënieve me presidentin e ri sirian, Ahmed al-Sharaa.
Sharaa ishte më herët i lidhur me grupin xhihadist al-Kaeda, ndërsa grupi Hayat Tahrir al-Sham (HTS), i cili udhëhoqi ofensivën që rrëzoi Bashar al-Assadin në fund të vitit 2024, është hequr gjithashtu nga listat amerikane të organizatave terroriste.
HTS, i njohur më parë si Fronti al-Nusra, kishte qenë dega siriane e al-Kaedës. Sharaa i ndërpreu lidhjet me këtë rrjet në vitin 2016.
Çfarë ndryshon për Sirinë?
Heqja nga lista amerikane pritet të largojë disa prej pengesave më të mëdha për investimet dhe aktivitetin ekonomik në Siri.
Rubio tha se vendimi u jep sirianëve një “rrugë drejt prosperitetit”, ndërsa Sekretari amerikan i Thesarit, Scott Bessent, deklaroi se masa mund të nxisë investime të reja dhe të kontribuojë në stabilitetin politik dhe ekonomik të vendit.
Ministri i Jashtëm sirian, Asaad Hassan al-Shaibani, e cilësoi vendimin si një “hap historik”, duke thënë se qeveria do të punojë për t’i dhënë fund pasojave të izolimit të Sirisë.
Siria ishte futur në listën amerikane të shteteve sponsorizuese të terrorizmit në vitin 1979. Me largimin e saj, në këtë listë mbeten vetëm Kuba, Koreja e Veriut dhe Irani.
Përcaktimi si shtet sponsorizues i terrorizmit sjell kufizime të konsiderueshme financiare, përfshirë pengesa për ndihmën amerikane, eksportet dhe shitjet e pajisjeve të mbrojtjes. Ky status mund të ketë pasoja edhe për kompanitë dhe shtetet që kryejnë transaksione me vendin e sanksionuar.
Megjithatë, pavarësisht ndryshimit të politikës amerikane, Siria vazhdon të përballet me sfida të mëdha politike dhe të sigurisë. Qeveria e re ende nuk ka arritur të krijojë një sistem plotësisht përfaqësues, ndërsa tensionet me fqinjët, përfshirë Izraelin dhe Turqinë, mbeten të larta.
Washingtoni synon që Siria e re të afrohet me Perëndimin dhe të mos përfshihet në orbitën e Rusisë apo Kinës.
Sinjali – aty ku e vërteta flet para lajmit!
