Një 14-vjeçar në Britani ka sulmuar me thikë një vajzë 14-vjeçare në një dyqan në Cirencester të Gloucestershire, pasi ajo kishte vendosur t’i jepte fund lidhjes me të.
Rasti, për të cilin ka raportuar BBC, është trajtuar në gjykatë, ku adoleshenti u dënua me një urdhër referimi 12-mujor dhe iu ndalua kontakti me vajzën për tre vjet.
Sipas policisë së Gloucestershire, të cituar nga BBC, dy të miturit kishin pasur një lidhje të shkurtër. Pasi vajza e kishte ndërprerë atë, 14-vjeçari kishte krijuar llogari të rreme në rrjetet sociale për t’i dërguar mesazhe.
Sulmi ndodhi më 15 mars. Adoleshenti e kishte pritur vajzën pranë një dyqani dhe e ndoqi brenda pasi ajo hyri për të blerë një pije.
Pamjet e kamerave të sigurisë, të paraqitura gjatë rastit, tregojnë se ai iu afrua vajzës dhe e sulmoi disa herë me thikë. Një punonjës i dyqanit ndërhyri për ta ndihmuar, por edhe ai u godit.
Vajza arriti të largohej nga dyqani dhe kërkoi ndihmë në një banesë aty pranë. Ajo pësoi lëndime në qafë, fytyrë, duar dhe shpinë.
Policia e arrestoi 14-vjeçarin pak pas sulmit. Gjatë kontrollit, në xhepin e tij u gjet një thikë.
Adoleshenti pranoi fajësinë për plagosje me dashje, shkaktim të dëmtimeve të rënda trupore pa dashje dhe mbajtje të një arme të ftohtë në vend publik.
Në deklaratën e saj për gjykatën, vajza tha se sulmi e ka lënë të frikësuar dhe se ka makthe të përsëritura për ngjarjen.
Detektivi Ian Fletcher, i policisë së Gloucestershire, tha se vajza kishte qenë “shumë, shumë me fat” që kishte shpëtuar nga një sulm që mund të kishte përfunduar fatalisht.
Sipas tij, rasti ishte veçanërisht shqetësues pasi sulmi ndodhi në mes të ditës dhe në një hapësirë publike.
Sinjali – aty ku e vërteta flet para lajmit!
