Zëdhënësi i Komisionit Qendror të Zgjedhjeve (KQZ), Valmir Elezi, ka bërë të ditur se procesi i paraparë zgjedhor po zhvillohet pa pengesa në të gjitha Qendrat Komunale të Numërimit (QKN) në vend.
Sipas Elezit, deri në orën 16:00 të së martës, numërimi ka përfunduar në tri komuna – Junik, Mamushë dhe Zveçan, ndërsa në Hanin e Elezit procesi është mbyllur mbrëmjen e së hënës.
Në të njëjtën kohë, KQZ ka njoftuar se kanë nisur punën edhe tri Qendra të reja të Numërimit: në Prishtinë, Podujevë dhe Kllokot.
Elezi ka sqaruar se në Qendrat Komunale të Numërimit zhvillohen tre procese paralele, që përfshijnë:
verifikimin e rezultateve nga zgjedhjet për Kryetarë të Komunave,
verifikimin e rezultateve të subjekteve politike nga zgjedhjet për Kuvendet Komunale,
si dhe numërimin e votave të kandidatëve për anëtarë të Kuvendeve Komunale.
Sipas të dhënave të fundit nga KQZ, deri në orën 16:00 janë verifikuar rezultatet për 550 vendvotime nga zgjedhjet për kryetarë komunash dhe 334 vendvotime për subjektet politike dhe kandidatët për Kuvendet Komunale.
Ndërkohë, në platformën zyrtare të KQZ-së kanë nisur të publikohen rezultatet nga Qendrat Komunale të Numërimit, përfshirë:
rezultatet e verifikuara nga zgjedhjet për kryetarë komunash,
rezultatet e subjekteve politike,
si dhe votat e kandidatëve për Kuvendet Komunale.
KQZ ka theksuar se procesi po vazhdon sipas planit dhe rezultatet do të përditësohen në mënyrë të vazhdueshme në faqen zyrtare të institucionit.
