Një ndërtesë në lagjen Veternik të Prishtinës është kthyer në cak të një personi të dyshuar për vjedhje, duke lënë banorët të shqetësuar dhe në kërkim të sigurisë. Pamjet e kamerave të sigurisë kanë zbuluar lëvizjet e tij gjatë orëve të vona të natës.
I veshur me rroba të errëta dhe duke lëvizur me kujdes, personi i dyshuar shihet duke hyrë në hapësirat e garazhit të një ndërtese në rrugën “Richard Holbrooke”.
Sipas pamjeve të siguruara nga Sinjali, personi ka hyrë gjatë natës në garazhin e ndërtesës në rrugën “Richard Holbrooke”, ku dyshohet se ka dëmtuar dhe ka vjedhur një veturë.
Ngjarja raportohet të ketë ndodhur rreth orës 03:30, ndërsa banorët thonë se kjo nuk është hera e parë që objekti përballet me raste të tilla.
Vetëm rreth tri javë më parë, një banesë në të njëjtin objekt ishte bërë cak i një vjedhjeje të rëndë.
Banorët u kanë bërë thirrje qytetarëve që, nëse kanë ndonjë informacion për identitetin e personit të paraqitur në pamje, të njoftojnë Policinë e Kosovës.
Rasti mbetet nën hetim, ndërsa autoritetet pritet të ndërmarrin veprimet e nevojshme për identifikimin dhe arrestimin e të dyshuarit.
Sinjali – aty ku e vërteta flet para lajmit!
