Policia e Kosovës ka realizuar dy ekstradime të rëndësishme brenda datave 30 prill dhe 1 maj 2026, në kuadër të bashkëpunimit të ngushtë me partnerët ndërkombëtarë dhe institucionet e drejtësisë.
Sipas njoftimit zyrtar, më 30 prill 2026, Drejtoria për Bashkëpunim Ndërkombëtar Policor, në koordinim me njësitë relevante të Policisë së Kosovës dhe institucionet e drejtësisë, ka bërë ekstradimin e një shtetasi kosovar nga Kroacia në Kosovë. I dyshuari ishte arrestuar nga autoritetet kroate, pasi kërkohej nga INTERPOL-i me urdhër ndërkombëtar të lëshuar nga institucionet kosovare.
Ai dyshohet për veprat penale “posedim, shpërndarje dhe shitje e substancave narkotike” si dhe “posedim të paautorizuar të armëve”, ndërsa më herët i ishte shmangur drejtësisë. Pas kthimit në Kosovë, i njëjti u është dorëzuar njësive përkatëse policore për vazhdimin e procedurave ligjore.
Ndërkohë, më 1 maj 2026, është realizuar edhe një ekstradim tjetër në drejtim të kundërt: një shtetas kosovar është dërguar nga Kosova në Suedi, pasi kërkohej nga autoritetet suedeze përmes INTERPOL-it, nën dyshimin për kryerjen e veprës penale “dhunim”.
Policia e Kosovës thekson se të dyja ekstradimet janë realizuar në përputhje me ligjet në fuqi dhe falë bashkëpunimit të ngushtë ndërmjet institucioneve vendore dhe shteteve përkatëse.
