Një person i dyshuar për tentimvrasje në Prishtinë është paraqitur në Polici, pas disa ditësh kërkimi nga organet e rendit, mëson ekskluzivisht Gazeta Sinjali.
Sipas burimeve të Sinjalit, rasti lidhet me incidentin e 16 qershorit, rreth orës 23:35, në rrugët “Jakup Ceraja” dhe “Feriz Guri” në Prishtinë.
Burimet bëjnë të ditur se pas ndërmarrjes së veprimeve hetimore, Policia ka identifikuar të dyshuarin Nderim Beqiraj, i cili ishte kërkuar në adresën e tij të banimit, por nuk ishte gjetur.
Të njëjtit i ishte lënë ftesë për paraqitje në Polici dhe më pas ishte vendosur në kërkim policor.
Më 22 qershor, i dyshuari është paraqitur në Stacionin Policor në Pejë, ku është intervistuar nga hetuesit policorë në prani të avokatit mbrojtës.
Pas intervistimit dhe me vendim të Prokurorit, i dyshuari është ndaluar për 48 orë.
Rasti po hetohet për veprat penale “Vrasje në tentativë” dhe “Mbajtja në pronësi, kontroll ose posedim të paautorizuar të armëve”.
Shënim: Personi i përmendur në këtë lajm konsiderohet i pafajshëm derisa fajësia e tij të vërtetohet me vendim të formës së prerë të gjykatës kompetente.
Sinjali – aty ku e vërteta flet para lajmit!
