Një ngjarje e rëndë është regjistruar mëngjesin e së shtunës në fshatin Krstec të Dragashit, ku një 73-vjeçar është gjetur pa shenja jete brenda shtëpisë së tij, raporton Sinjali.
Burimet e Sinjalit bëjnë me dije se viktima është Ismail Sulejmani, 73-vjeçar, i cili jetonte i vetëm.
Rasti është zbuluar nga djali i tij, i cili kishte ardhur nga Beogradi, ku aktualisht jeton, pikërisht për ta vizituar të atin.
Sipas informacioneve që ka Sinjali, ai kishte mbërritur rreth orës 07:00 dhe, pasi kishte hyrë në shtëpi, e kishte gjetur babanë të shtrirë në krevat, pa shenja jete.
Në ambient kishte edhe kundërmim të rëndë, çka e kishte shtyrë të birin të drejtohej menjëherë në Stacionin Policor në Dragash dhe ta raportonte rastin.
Rreth orës 08:15, Policia është vënë në lëvizje dhe njësitë përkatëse kanë dalë në vendin e ngjarjes.
Aty kanë mbërritur hetuesit dhe forenzika e Stacionit Policor në Dragash, ndërsa ekipi mjekësor i QKMF-së ka konstatuar vdekjen e 73-vjeçarit.
Në hetimin e rastit janë përfshirë edhe Hetimet Rajonale nga Prizreni dhe një ekip i Institutit të Mjekësisë Ligjore.
Për rastin është njoftuar Prokurori i Shtetit, i cili ka urdhëruar që të iniciohet “Hetim i vdekjes” dhe trupi i pajetë të dërgohet në IML për obduksion.
Në këtë fazë nuk dihet shkaku i vdekjes, ndërsa rrethanat pritet të sqarohen pas ekzaminimit mjekoligjor dhe përfundimit të veprimeve hetimore.
Sinjali – aty ku e vërteta flet para lajmit!
