Arabia Saudite ka mbyllur një tubacion të rëndësishëm të naftës pasi u sulmua me dronë të lëshuar nga Iraku, në një zhvillim që tregon zgjerimin e konfliktit në Lindjen e Mesme.
Iraku ka shkarkuar nga detyra një komandant ushtarak dhe ka nisur hetimet, pasi pranoi se sulmi me dronë ndaj tubacionit “East-West” të Arabisë Saudite ishte nisur nga një provincë irakiane në kufi me Iranin.
Tubacioni, i cili shtrihet për rreth 1,200 kilometra, i ka mundësuar Arabisë Saudite – eksportuesit më të madh të naftës bruto në botë – të shmangë ngushticën e Hormuzit, raporton BBC – transmeton Sinjali.
Rijadi njoftoi të premten se tubacioni është mbyllur përkohësisht si masë paraprake. Autoritetet saudite thanë se sulmi shkaktoi disa të lënduar dhe dëme materiale, ndërsa vlerësimi i plotë i dëmeve është ende duke u bërë.
Sipas Reuters, duke cituar kompani të gjurmimit të anijeve dhe analistë, tubacioni ka transportuar rreth 4 deri në 5 për qind të furnizimit global me naftë.
Arabia Saudite ka vendosur për momentin të mos hakmerret ndaj Irakut, pas një telefonate me kryeministrin irakian. Ministria e Jashtme saudite tha se Rijadi do të mbështesë përpjekjet e qeverisë irakiane për të parandaluar sulmet nga territori i saj ndaj shteteve fqinje.
Megjithatë, Arabia Saudite paralajmëroi se rezervon të drejtën për të marrë të gjitha masat e nevojshme për mbrojtjen e sovranitetit, sigurisë dhe objekteve të saj strategjike, si dhe për garantimin e sigurisë së qytetarëve dhe banorëve.
Zyra e kryeministrit të Irakut konfirmoi se komandanti i operacioneve në provincën Maysan, e cila kufizohet me Iranin, është shkarkuar nga detyra pasi u konfirmua se dronët ishin lëshuar nga kjo zonë.
Sulmin e ka dënuar edhe Këshilli i Bashkëpunimit të Gjirit, duke e cilësuar si “përshkallëzim të rrezikshëm” dhe kërcënim të papranueshëm ndaj sigurisë së Arabisë Saudite dhe infrastrukturës së saj jetike.
Sinjali – aty ku e vërteta flet para lajmit!
