Kapiteni i Austrisë, David Alaba, beson se kombëtarja e tij ka potencialin të surprizojë Spanjën në ndeshjen e fazës së 1/16 së finales në Kupën e Botës, edhe pse përballë do të ketë një nga skuadrat më të forta të turneut.
Në një intervistë për “MARCA”, para duelit eliminator, ish-mbrojtësi i Real Madridit e pranoi se Spanja është një kundërshtar jashtëzakonisht cilësor dhe ndër favoritët për ta fituar trofeun. Megjithatë, ai theksoi se Austria do të zbresë në fushë me vetëbesim dhe e bindur se mund të bëjë një paraqitje të madhe.
“Spanja është një nga kombëtaret më të mira në botë dhe padyshim një nga pretendentet kryesore për titull,” deklaroi Alaba.
“Jemi të vetëdijshëm se na pret një sfidë shumë e fortë dhe se duhet të japim maksimumin, por futbolli gjithmonë lë vend për befasi.”
Alaba, i cili kaloi pesë sezone me fanellën e Real Madridit, tha se kjo sfidë ka një domethënie të veçantë për të, pasi e lidhin kujtime të shumta me futbollin spanjoll dhe me lojtarët ndaj të cilëve ka luajtur për vite me radhë në La Liga.
Ai shtoi se trajnerët do ta përgatisin ekipin në mënyrën më të mirë të mundshme dhe se është gati të kontribuojë me përvojën e tij sa herë që skuadra të ketë nevojë.
Austria e siguroi kalimin në fazën me eliminim direkt pas paraqitjeve bindëse në grupe, ndërsa tani synon të vazhdojë rrugëtimin dhe të arrijë një kualifikim historik në 1/8 e finales së Kupës së Botës, diçka që nuk e ka realizuar prej shumë vitesh.
Sinjali – aty ku e vërteta flet para lajmit!
