Policia e Kosovës ka intensifikuar zbatimin e urdhër-arresteve në rajonin e Gjakovës, duke arrestuar tetë persona të kërkuar nga organet e drejtësisë gjatë periudhës 14–22 korrik 2026.
Sipas njoftimit të Drejtorisë Rajonale të Policisë në Gjakovë, katër nga të arrestuarit janë dërguar për vuajtjen e dënimit me burg, në bazë të vendimeve të formës së prerë të gjykatave. Ndërsa katër persona të tjerë janë liruar pasi kanë shlyer detyrimet financiare të përcaktuara në aktvendimet gjyqësore.
Policia ka theksuar se aksionet për lokalizimin dhe arrestimin e personave të kërkuar do të vazhdojnë edhe në ditët në vijim, si pjesë e angazhimit për zbatimin e vendimeve të gjykatave dhe forcimin e rendit e ligjit.
Autoritetet u kanë bërë thirrje qytetarëve të bashkëpunojnë me institucionet e sigurisë dhe të raportojnë çdo informacion që mund të ndihmojë në identifikimin ose lokalizimin e personave në kërkim.
Sinjali – aty ku e vërteta flet para lajmit!
