Nëse konsumoni herë pas here një gotë verë ose një koktej, por njëkohësisht merrni medikamente, është e rëndësishme të dini se kombinimi i alkoolit me disa barna mund të shkaktojë efekte anësore serioze.
Mjekët paralajmërojnë se alkooli mund të ndikojë në mënyrën se si trupi e përthith dhe e metabolizon një ilaç, duke e bërë atë më pak efektiv ose duke rritur rrezikun e efekteve të padëshiruara. Rreziku varet nga lloji i medikamentit, doza, sasia e alkoolit dhe gjendja shëndetësore e personit.
Sipas ekspertëve, disa prej grupeve të barnave që kërkojnë kujdes të veçantë gjatë konsumimit të alkoolit janë:
Qetësuesit e dhimbjeve
“Kurse alkooli kombinohet me medikamente si acetaminofeni (Tylenol) dhe anti-inflamatorët josteroidë (NSAID), si aspirina ose ibuprofeni, mund të shkaktojë dëmtim të mëlçisë dhe gjakderdhje gastrointestinale”, thotë farmacistja Katy Dubinsky, Pharm.D.
Thomas Pontinen thekson se alkooli dhe shumë medikamente metabolizohen nga mëlçia. Për këtë arsye, kombinimi i tyre mund t’i shkaktojë stres të madh këtij organi dhe të përkeqësojë probleme të tjera, përfshirë sëmundjet e mëlçisë.
Antidepresantët
Sipas Laura Purdy, M.D., antidepresantët mund të jenë më pak efektivë kur kombinohen me alkool dhe, në disa raste, kombinimi mund t’i përkeqësojë simptomat.
Këtu përfshihen inhibitorët selektivë të rimarrjes së serotoninës (SSRI) dhe inhibitorët e rimarrjes së serotoninës dhe norepinefrinës (SNRI).
Kombinimi mund të shkaktojë gjithashtu përgjumje dhe të ndikojë në koordinimin e lëvizjeve. Alkooli mund të rrisë marramendjen dhe përgjumjen dhe, në disa raste, të ulë efektivitetin e trajtimit.
Antibiotikët
“Marrja e disa antibiotikëve së bashku me alkoolin mund të shkaktojë efekte anësore serioze, si dhimbje koke, skuqje të fytyrës dhe të përziera”, thotë Dubinsky.
Shembuj të tillë janë metronidazoli dhe tinidazoli.
Në veçanti, alkooli mund të shkaktojë dehidratim të organizmit duke penguar çlirimin e vazopresinës. Meqenëse marrja e mjaftueshme e lëngjeve është e rëndësishme gjatë luftimit të një infeksioni, konsumimi i alkoolit mund t’i përkeqësojë simptomat dhe të zgjasë kohën e rikuperimit.
Antipsikotikët
“Alkooli mund të intensifikojë efektet qetësuese të barnave antipsikotike, duke shkaktuar dëmtim të aftësive mendore dhe fizike”, shpjegon Dubinsky.
Pasojat e mundshme të kombinimit përfshijnë vështirësi në frymëmarrje, presion të ulët të gjakut dhe të fikët. Në raste të rënda, mund të shfaqen edhe kriza konvulsive ose koma.
Ilaçet kundër ankthit dhe qetësuesit
Kombinimi i alkoolit me benzodiazepina, përfshirë Xanax dhe Valium, si dhe me ilaçe për gjumë, si Ambien, mund të shkaktojë përgjumje të theksuar, vështirësi në frymëmarrje dhe qetësim të rrezikshëm për jetën.
“Ilaçet kundër ankthit dhe alkooli mund të shkaktojnë sjellje të pazakonta, humbje të kujtesës dhe probleme me kontrollin e lëvizjeve. Ashtu si me ilaçet për gjumë, mund të shfaqen edhe vështirësi në frymëmarrjen normale”, thotë Purdy.
Ilaçet për diabetin
Ndërveprimi i alkoolit me disa medikamente për diabetin mund t’i vendosë personat në rrezik për nivele shumë të ulëta ose shumë të larta të sheqerit në gjak, në varësi të pijes së konsumuar dhe ilaçit të përdorur.
Disa pije alkoolike, si birra dhe koktejet e ëmbla, përmbajnë gjithashtu sasi të larta karbohidratesh, të cilat mund të ndikojnë në nivelin e sheqerit në gjak.
Simptomat e sheqerit të ulët në gjak mund të përfshijnë shikim të dyfishtë ose të turbullt, djersitje, ndjesi shpimi gjilpërash dhe mpirje, lodhje, rrahje të shpejta ose të forta të zemrës, dridhje dhe vështirësi në të menduar.
Ndërsa simptomat e sheqerit të lartë në gjak përfshijnë etje, lodhje ose dobësi, dhimbje koke, urinim të shpeshtë dhe shikim të turbullt.
Dubinsky thotë se kjo mund të ndodhë me ilaçe për diabetin, si insulina ose sulfonilureat.
Holluesit e gjakut
Holluesit e gjakut, të njohur gjithashtu si antikoagulantë ose barna antiplaketare, përdoren për parandalimin e mpiksjes së gjakut. Ato mund t’u përshkruhen personave me sëmundje të caktuara të zemrës, defekte të lindura të zemrës ose personave që përgatiten për një ndërhyrje kirurgjikale.
“Konsumimi i alkoolit mund të ndërhyjë në mënyrën se si funksionojnë varfarina dhe holluesit e tjerë të gjakut, duke rritur rrezikun e mpiksjes ose të gjakderdhjes”, thotë Dubinsky.
Efekte të tjera të mundshme
Ekspertët paralajmërojnë se përveç këtyre grupeve të medikamenteve, edhe barna të tjera mund të shkaktojnë efekte anësore të padëshiruara kur kombinohen me alkool.
“Në disa situata, pasojat mund të jenë fatale dhe mund të ekzistojë edhe rreziku i mbidozimit”, paralajmëron Purdy. “Nëse keni probleme shëndetësore për të cilat merrni medikamente, ose edhe nëse keni një problem shëndetësor për të cilin nuk jeni në dijeni, mund të shfaqen efekte anësore shtesë dhe simptoma të reja që mund të jenë kërcënuese për jetën.”
Alkooli gjithashtu mund ta bëjë një ilaç më pak efektiv ose edhe joefektiv dhe mund të ndërveprojë në mënyrë të rrezikshme me përbërës të caktuar të medikamenteve.
Si të qëndroni të sigurt?
Pavarësisht nëse medikamenti është me recetë, pa recetë apo i një lloji tjetër, ekspertët këshillojnë që të flisni me mjekun ose farmacistin përpara se të konsumoni alkool.
“Mund të shfaqen një sërë efektesh anësore dhe simptomash, përfshirë ndryshime të presionit të gjakut, të fikët, ndryshime në sjellje, madje edhe të përziera, të vjella, marramendje dhe dhimbje koke”, thotë Purdy.
Ajo paralajmëron gjithashtu për rreziqet gjatë drejtimit të automjetit ose përdorimit të makinerive të rënda, pasi mungesa e koordinimit dhe ndryshimet në humor, emocione dhe sjellje mund të përbëjnë rrezik.
“Kombinimi i medikamenteve me alkoolin mund të jetë i rrezikshëm, madje edhe kërcënues për jetën. Prandaj, mos ndërmerrni rreziqe të panevojshme dhe shmangni alkoolin gjatë marrjes së medikamenteve, përveçse nëse jeni të sigurt se është i sigurt për ju”, thotë ai.
Po nëse keni konsumuar alkool ndërkohë që merrni ilaçe?
Nëse keni konsumuar alkool ndërkohë që jeni duke marrë medikamente, ekspertët këshillojnë të qëndroni pranë një personi të besuar, veçanërisht nëse ekziston rreziku për humbje të vetëdijes.
“Nëse pas kombinimit të medikamenteve me alkoolin filloni të përjetoni simptoma të rënda, si dhimbje koke, dhimbje gastrointestinale, të përziera, marramendje ose përgjumje, kërkoni menjëherë ndihmë mjekësore dhe qëndroni me një person të afërt, i cili është i gatshëm t’ju ndihmojë derisa të mbërrijë ndihma mjekësore.”
Në fund, është e rëndësishme të theksohet se jo çdo ilaç ndërvepron me alkoolin në të njëjtën mënyrë. Rreziku varet nga medikamenti, doza, sasia e alkoolit dhe gjendja shëndetësore e personit.
Edhe nëse alkooli dhe ilaçi nuk merren në të njëjtën kohë, ndërveprimi mund të jetë i mundur. Për këtë arsye, para konsumimit të alkoolit gjatë një trajtimi medikamentoz, këshillohet të konsultoheni me mjekun ose farmacistin.
Sinjali – aty ku e vërteta flet para lajmit!
