Një zjarr shpërtheu në aeroportin ushtarak Morozovsk në rajonin Rostov të Rusisë.
Sipas burimit “Krymsky Veter”, zjarri filloi në zonën e parkimit të aeroplanëve luftarakë dhe në atë të batalionit të inxhinierisë.
Shkaku nuk është konfirmuar ende, por një sulm me dron nuk përjashtohet – vetëm një ditë më parë, rajoni u përball me një sulm të madh ajror.
Guvernatori i rajonit këmbëngul se mbrojtja ajrore “e zmbrapsi me sukses sulmin”, megjithëse dëmet e raportuara sugjerojnë të kundërtën.
Baza Morozovsk është shtëpia e Regjimentit të 559-të të Aviacionit Bombardues të Gardës, që operon me aeroplanët Su-34 dhe Su-30/35.
Forcat ukrainase e kanë goditur më parë këtë aeroport – në muajin gusht, shpërthime goditën depot ku ruheshin bomba dhe raketa. /Telegrafi/
