Presidenti ukrainas, Volodymyr Zelensky, ka kritikuar vendimin e administratës amerikane për t’i zbutur sanksionet ndaj naftës ruse gjatë një vizite në Francë.
Ai theksoi se vendimi nuk ndihmon në përfundimin e luftës dhe në arritjen e paqes në Ukrainë, teksa kërkoi siguri dhe mbështetje për vendin në kohën e luftës në Lindjen e Mesme.
Gati dy javë pasi SHBA-ja dhe Izraeli nisën sulmet ndaj Iranit, një prej pasojave kryesore ka qenë rritja globale e çmimeve të naftës, që ka kontribuar në mënyrë indirekte në sigurimin e përfitimeve për Rusinë. Krahas kësaj, shqetësimet në rritje rreth luftës në Lindjen e Mesme kanë ndikuar edhe në largimin e fokusit nga lufta që Rusia e nisi mbi katër vjet më parë në Ukrainë.
Presidenti ukrainas paralajmëroi se konflikti në Lindjen e Mesme e ka ndërlikuar furnizimin me armë për Ukrainën.
Nga ana e tij, presidenti francez, Emmanuel Macron, ka theksuar se nuk ekziston asnjë justifikim për heqjen e sanksioneve ndaj Rusisë, duke shtuar se Moska zyrtare e ka gabim nëse mendon që lufta në Iran do t’i japë hapësirë për pushim.
Sinjali – aty ku e vërteta flet para lajmit!
