Youtuberi më i njohur në botë, MrBeast, ka shprehur shqetësimin e tij për përparimin e shpejtë të inteligjencës artificiale gjeneruese, duke e cilësuar atë si “të frikshëm” për miliona krijues që jetojnë nga përmbajtja që prodhojnë.
Mjetet e inteligjencës artificiale që mund të krijojnë video të plota nga udhëzime të thjeshta tekstuale kanë bërë përparime të mëdha vitet e fundit.
Së fundmi, publikimi i sistemit Sora nga OpenAI ka ngjallur debat për mënyrën e lehtë me të cilën mund të riprodhohen personazhe dhe materiale të mbrojtura me të drejta autoriale.
Në rrjetet sociale, MrBeast, emri i vërtetë i të cilit është Jimmy Donaldson – ngriti shqetësimin se çfarë do të ndodhë me krijuesit si ai “kur videot e AI-së të jenë po aq të mira sa videot normale”.
Frika për ndikimin e AI-së në tregun e punës është e përhapur, por është veçanërisht e ndjeshme në industritë krijuese, si ato të filmit dhe videolojërave, ku ka pasur protesta e greva të shumta mbi përdorimin e inteligjencës artificiale.
Përkundër shqetësimeve, AI tashmë po përdoret gjerësisht në të njëjtat sektorë. YouTube, për shembull, ofron mjete të bazuara në AI për krijuesit e përmbajtjes, përfshirë gjenerimin e videove përmes Veo, teknologjisë së re të Google. Ajo gjithashtu mund të përdoret për gjenerimin automatik të titrave apo për zhvillimin e ideve e skenarëve.
Sipas Lars Erik Holmquist, profesor i dizajnit dhe inovacionit në Universitetin Nottingham Trent, shumë video në YouTube janë tashmë të krijuara plotësisht nga AI, si p.sh. videot relaksuese që ndihmojnë njerëzit të flenë.
“Trendi i përgjithshëm që po shohim është se inteligjenca artificiale e bën kreativitetin shumë më të lirë. Mendoj se njerëzit që do të fitojnë në afat të shkurtër do të jenë vetëm ata që e përdorin atë për të krijuar përmbajtje vërtet të mirë,” tha ai.
Megjithatë, sipas tij, për krijues si MrBeast nuk ka gjasa që AI ta zëvendësojë ndikimin e tij.
“Ideja e tij e tërë është t’i bëjë njerëzit të bëjnë gjëra të pakëndshme ose të rrezikshme për para – dhe nëse nuk do të ishte e vërtetë, askush nuk do ta shikonte,” shtoi profesori Holmquist.
Sipas raportimeve, MrBeast e ka përdorur më parë inteligjencën artificiale në proceset e prodhimit dhe grafikës, por është përballur me reagime negative kur prezantoi një mjet AI që gjeneronte miniatura për videot e tij.
Pas kritikave, ai hoqi mjetet nga platforma e tij analitike dhe ofroi lidhje me dizajnerët njerëzorë.
Ndërkohë, Veo, gjeneratori i videove të Google, trajnohet në një nëngrup të videove në YouTube, ndonëse ende nuk dihet se sa materiale përfshihen dhe nëse videot e MrBeast janë pjesë e këtij procesi.
Sinjali – aty ku e vërteta flet para lajmit!