Presidenti i Kinës, Xi Jinping, dhe homologu i tij rus, Vladimir Putin, po shfaqin një bashkëpunim të ngushtë, duke e portretizuar veten si aleatë të pathyeshëm në skenën globale. Por pas këtij afrim publik, Pekini po e kalkulon me kujdes çdo hap, për të ruajtur ekuilibrin mes aleancës me Moskën dhe interesave të tij me partnerë të tjerë ndërkombëtarë, veçanërisht në kohën kur raportet me Shtetet e Bashkuara janë të tensionuara.
Xi qëndroi pranë Putinit në tribunën e Sheshit të Kuq, gjatë paradës së Ditës së Fitores, duke simbolizuar një aleancë të konsoliduar.
Gjatë kësaj vizite, të 11-tës në Rusi që nga viti 2013, ai e cilësoi marrëdhënien me Rusinë si një lidhje “të pathyeshme”, duke shtuar se dy vendet duhet të jenë “miq të çeliktë”.
Putini ka paralajmëruar se do ta vizitojë Kinën në vjeshtë, ndërsa lidhja e tyre është përforcuar edhe nga përqafimet dhe komunikimi i shpeshtë mes tyre – mbi 40 takime në më pak se 12 vjet.
Por pas kësaj fasade diplomatike, ekzistojnë tensione të nënkuptuara dhe një garë për ndikim global. Analistët paralajmërojnë se marrëdhënia mund të jetë më komplekse sesa paraqitet publikisht.
“Ne shohim shumë shkëmbime midis dy burrave dhe shfaqje patriotike të bashkëjetesës”, deklaron Mathieu Boulegue nga Qendra për Analizën e Politikave Evropiane.
“Ata mund të jenë miq nga njëra anë ose të bashkëpunojnë nga njëra anë dhe pastaj të shqyejnë njëri-tjetrin nga ana tjetër, dhe në fakt të jenë konkurrentë në aspekte të caktuara të marrëdhënies së tyre.”
Kina ecën mbi një tel të hollë diplomatik. Nga njëra anë, Rusia mbetet partnere strategjike, por nga ana tjetër, agresioni ndaj Ukrainës ka izoluar Moskën ndërkombëtarisht dhe ka vendosur Kinën në një pozitë të ndjeshme, veçanërisht në raport me Evropën dhe SHBA-në.
Pekini ka intensifikuar kontaktet me Evropën, duke tentuar të pozicionohet si një fuqi globale e qëndrueshme dhe e besueshme, në kontrast me qasjen e paparashikueshme të Uashingtonit, sidomos gjatë presidencës së Donald Trumpit. Në këtë linjë, gjatë 50-vjetorit të marrëdhënieve BE-Kinë, janë shkëmbyer mesazhe mes liderëve evropianë dhe Xi Jinping.
Por kjo qasje diplomatike rrezikon të zbehet nga mbështetja ekonomike që Kina i jep Rusisë dhe mungesa e dënimit për pushtimin e Ukrainës. Kina ka zgjedhur të mos e kritikojë publikisht “mikun e saj të vjetër”, duke bërë vetëm thirrje për përfundimin e “krizës”.
Xi synon gjithashtu të dërgojë një mesazh të qartë ndaj Trumpit, në rast të rikthimit të tij në Shtëpinë e Bardhë. Ish-presidenti amerikan ka deklaruar shpesh afërsinë e tij me Putinin dhe përpjekjet për t’i dhënë fund luftës në Ukrainë, gjë që ngriti dyshime për ndarje të mundshme midis Moskës dhe Pekinit.
“Së bashku, ne duhet të pengojmë të gjitha skemat për të prishur ose minuar lidhjet tona të miqësisë dhe besimit”, shkroi Xi në një artikull të publikuar në mediat ruse.
Ndërsa Pekini e shfaq veten si partner i barabartë, realiteti është i ndryshëm. Rusia, e dobësuar ekonomikisht dhe ushtarakisht nga lufta dhe sanksionet perëndimore, varet gjithnjë e më shumë nga Kina për të mbijetuar.
“Rusia ka nevojë për Kinën shumë më tepër sesa e kundërta”, thotë Boulegue.
“Moska do të duhet ta ‘përthithë’ këtë realitet.”
Pavarësisht shtrëngimeve të duarve dhe fjalëve të mëdha, marrëdhënia mund të përballet me sfida serioze në vitet që vijnë, pasi balanca e fuqisë mes tyre ndryshon dhe interesat kombëtare përplasen në mënyra të papritura.
Sinjali – aty ku e vërteta flet para lajmit!
The post Xi ruan distancën nga Putini, mesazhi që trondit miqësinë “e çeliktë” appeared first on Sinjali.
