Futbollisti izraelit Manor Solomon, i cili aktualisht është i huazuar nga Tottenham Hotspur te klubi spanjoll Villarreal, u bë figurë qendrore në ndeshjen në të cilën skuadra e tij festoi kundër Sevillas (2-1), por jo vetëm për shkak të golit, por edhe për shkak të ofendimeve politike nga tribunat.
Anëtari 26-vjeçar i kombëtares izraelite hyri në lojë në minutën e 83-të të ndeshjes në stadiumin ikonik “Ramon Sanchez-Pizjuan”, ku u prit nga një breshëri vërshëllimash dhe fyerjesh nga disa prej tifozëve të ekipit vendas.
Ndërsa ai hyri në fushë, nga tribunat shpërthyen britma: “Izraelitët janë vrasës”.
Fyerjet erdhën veçanërisht nga grupi ultras “Biris Norte”, i cili publikoi një mesazh edhe para ndeshjes.
“Ky përkrahës i gjenocidit po na viziton shtëpinë. Jemi të qartë për këtë çështje… Nuk ka vend për sionistët në Nervion”, shkruan anëtarët e këtij grupi përpara ndeshjes.
Megjithatë, kjo nuk e dekurajoi Solomonin, i cili shënoi golin e fitores për “Nëndetësen e Verdhë”, e cila arriti fitoren e katërt këtë sezon.
Ndryshe, ai është përballur me ngacmime serioze më parë, veçanërisht pasi mbështeti publikisht Izraelin në tetor 2023 pas sulmit të Hamasit. Që atëherë, së bashku me reagimet negative në stadiume, ai merr rregullisht kërcënime dhe fyerje përmes rrjeteve sociale.
Gjatë një ndeshjeje midis Leeds dhe Stoke City në dhjetor 2024, u dëgjuan thirrje antisemite, prandaj Leeds lëshoi një deklaratë dhe njoftoi sanksione kundër atyre që ishin përgjegjës.
Në qershor të vitit 2025, Solomoni u vu përsëri në shënjestër kur klubi postoi një mesazh urimi për martesën e tij me partneren Dana Voshina. Komentet e urryera e përmbytën postimin, me fyerje që e quanin lojtarin “gjenocidal”, “sionist” dhe “vrasës fëmijësh”.
Gjithashtu, ndërsa po kthehej në Izrael për një martesë, Solomoni mbeti i bllokuar në vend për shkak të mbylljes së hapësirës ajrore gjatë konfliktit me Iranin, gjë që tërhoqi më tej vëmendjen e publikut ndaj situatës së tij. /Telegrafi/