Donald Trump ka zbuluar se manjati i medias Rupert Murdoch dhe djali i tij Lachlan mund të jenë pjesë e një marrëveshjeje në të cilën TikTok në Shtetet e Bashkuara do të kalojë nën kontrollin amerikan.
Presidenti amerikan përmendi gjithashtu Michael Dell, themeluesin dhe CEO-n e Dell Technologies, si një pjesëmarrës të mundshëm në marrëveshje gjatë një interviste me Fox News, e cila është në pronësi të Murdoch-ëve, shkruajnë mediat e huaja, përcjell Telegrafi.
“Mendoj se ata do të jenë në grup. Disa të tjerë. Njerëz vërtet të shkëlqyer, njerëz shumë të shquar”, citohet të ketë thënë Trump. “Dhe ata janë gjithashtu patriotë amerikanë, e dini, ata e duan këtë vend. Mendoj se do të bëjnë një punë vërtet të mirë”.
Trump theksoi se Larry Ellison, themelues dhe CEO i firmës së softuerëve Oracle, ishte pjesë e të njëjtit grup.
Përfshirja e tij në marrëveshjen e mundshme të TikTok ishte zbuluar më parë.
Ndërkohë, sekretarja e shtypit e Shtëpisë së Bardhë, Karoline Leavitt, tha të shtunën se Oracle do të jetë përgjegjëse për të dhënat dhe sigurinë e aplikacionit, me amerikanët që do të kontrollojnë gjashtë nga shtatë vendet për një bord të planifikuar të TikTok.
Kjo vjen pasi zoti Trump tha se ai dhe Xi Jinping i Kinës zhvilluan një “bisedë shumë produktive” të premten, duke diskutuar miratimin përfundimtar për marrëveshjen e TikTok, shumica e së cilës është ende e panjohur. /Telegrafi/