Presidenti amerikan, Donald Trump, ka kërcënuar se do të vendosë tarifa “masive” ndaj produkteve kineze, duke akuzuar Pekinin për veprime armiqësore në kufizimin e eksportit të metaleve të rralla, të domosdoshme për industrinë amerikane.
Pas këtyre deklaratave, Wall Street regjistroi rënie të ndjeshme, ndërsa tensionet mes Shteteve të Bashkuara dhe Kinës u përshkallëzuan, duke rritur rrezikun e një lufte tregtare mes dy ekonomive më të mëdha në botë.
“Nuk e mendoja se do të arrinte deri këtu, por ndoshta, si me shumë gjëra, ka ardhur momenti”, shkroi Trump në rrjetin e tij social Truth Social, duke shtuar: “Në fund të fundit, edhe pse mund të jetë e dhimbshme, kjo do të jetë shumë e dobishme për SHBA-në.”
Trump njoftoi se po shqyrtohet rritja “masive” e tarifave për produktet kineze që hyjnë në SHBA dhe shtoi se po merren parasysh edhe masa të tjera të ashpra kundër Kinës.
Ai gjithashtu sugjeroi se takimi i planifikuar me presidentin kinez, Xi Jinping, në Korenë e Jugut më vonë këtë muaj mund të mos zhvillohet, duke thënë se “duket se nuk ka arsye” për një takim të tillë.
Sinjali – aty ku e vërteta flet para lajmit!