“Izraeli na rrëmbeu në ujërat ndërkombëtare kundër vullnetit tonë”.
Kështu deklaroi aktivistja suedeze, Greta Thunberg nga Parisi, pasi Izraeli dëboi atë dhe aktivistë të tjerë që ishin nisur me anijen Madleen drejt Gazës, për të çuar ndihma humanitare.
Megjithatë tha Thunberg, kushtet me të cilat ata u përballën, nuk janë absolutisht asgjë në krahasim me atë që po kalojnë njerëzit në Palestinë dhe veçanërisht në Gaza.
“Ata bënë një akt të paligjshëm duke na rrëmbyer në ujëra ndërkombëtare dhe kundër vullnetit tonë, duke na sjellë në Izrael, duke na mbajtur në fund të barkës, duke mos na lënë të dalim e kështu me radhë. Por kjo nuk është historia e vërtetë këtu. Historia e vërtetë është se në Gaza po ndodh një gjenocid dhe një uri sistematike pas rrethimit dhe bllokadës, e cila po çon në pengimin e ushqimit, ilaçeve, ujit që nevojiten urgjentisht.”
Thunberg ishte një nga 12 pasagjerët në Madleen, një anije që transportonte ndihma për në Gaza, e cila kishte për qëllim të protestonte kundër luftës së vazhdueshme të Izraelit atje dhe të hidhte dritë mbi krizën humanitare në territorin palestinez, sipas Koalicionit të Flotiljes së Lirisë, grupit që qëndron pas udhëtimit.
“Ne ishim shumë të vetëdijshëm për rreziqet e këtij misioni. Dhe siç thashë më parë, ka pasur shumë flotilje të mëparshme në misione të ngjashme që janë sulmuar, janë ndaluar ose kanë arritur në Gaza. Ne nuk shkelëm ligjet. Ne nuk bëmë asgjë të gabuar. Do të vazhdojmë të përpiqemi të bëjmë gjithçka që mundemi. Sepse ky është premtimi që u kemi dhënë palestinezëve.”
“Dhe, sigurisht, të kërkohet jo vetëm që ndihma humanitare të lejohet në Gaza, por edhe një armëpushim, por më e rëndësishmja, t’i jepet fund pushtimit, t’i jepet fund shtypjes dhe dhunës sistemike me të cilën palestinezët po përballen çdo ditë.”
Aktivistja suedeze bëri thirrje për një armëpushim në Gaza, por mbi të gjitha që t’i jepet fund shtypjes dhe dhunës sistemike me të cilën palestinezët po përballen çdo ditë. Ajo akuzoi Izraelin se po shkel ligjin ndërkombëtar dhe po kryen vazhdimisht krime lufte.
Sinjali – aty ku e vërteta flet para lajmit!
