Terence “Bud” Crawford (42-0) ka hyrë përfundimisht në librat e historisë së boksit pas fitores ndaj Saul “Canelo” Alvarez (63-3) në Las Vegas.
Amerikani triumfoi me vendim unanim të gjyqtarëve (115-113, 115-113, 116-111) dhe u bë boksieri i parë që bashkon të gjithë titujt më të rëndësishëm botërorë në një kategori të tretë të ndryshme peshe.
Crawford, i cili më parë kishte sunduar në peshat super të lehta dhe welterweight, guxoi të sfidonte Canelon në divizionin super të mesëm, tre kategori mbi peshën e tij natyrale. Para 70,000 spektatorëve në arenën e Las Vegasit, pas 12 raundeve të zjarrta, ai doli fitues dhe mbeti i pamposhtur.
Për Canelon, kjo ishte humbja e tretë në karrierë, pas atyre ndaj Floyd Mayweather Jr. dhe Dmitry Bivol. Megjithatë, meksikani mbetet një prej emrave më të mëdhenj në historinë e sportit, edhe pse këtë herë u detyrua të përulej para mjeshtrisë së amerikanit.
– YouTube www.youtube.com
Ndeshja, e organizuar nga Turki Alalshikh dhe Dana White, është cilësuar si më e shikuara e boksit në 50 vitet e fundit, duke marrë një shtysë të madhe edhe nga fakti se u transmetua falas për abonentët e Netflix.
Në aspektin financiar, kontrasti ishte i madh: Crawford fitoi rreth 10 milionë dollarë për suksesin e tij historik, ndërsa Canelo, pavarësisht humbjes, inkasoi plot 150 milionë dollarë.
Me këtë fitore, Crawford vulosi statusin e tij si një nga boksierët më të mëdhenj të të gjitha kohërave, duke shënuar një epokë të re në sportin e dorës së hekurt. /Telegrafi/