Nga qeset e vakumit te organizatorët e sirtarëve – mënyra të thjeshta për ta mbajtur gardërobën të pastër, të rregullt dhe gjithmonë gati për sezonin tjetër
Të jetosh në një banesë të vogël shpesh do të thotë të ballafaqohesh me dilema të përditshme: ku t’i vendosësh palltot e trasha kur vjen vera, apo ku të ruash fustanet dhe rrobat e lehta gjatë dimrit?
Mungesa e hapësirës sjell jo vetëm rrëmujë vizuale, por edhe dëmtim të gardërobës, rroba të ngjeshura që humbasin formën, materiale të ndjeshme që marrin erë lagështie, apo aksesorë që humbasin mes grumbujve.
Organizimi i zgjuar bën ndryshimin. Me metoda praktike si qeset e vakumit, kutitë e ulëta për poshtë shtratit, organizatorët për aksesorë apo përdorimi i rafteve të larta, edhe një banesë e vogël mund të ofrojë hapësirë të mjaftueshme. Jo vetëm që kurseni vend, por edhe e ruani gardërobën të pastër, të mbrojtur dhe gjithmonë të gatshme për sezonin tjetër.
Në vijim gjeni disa këshilla të thjeshta, por shumë efektive, që do t’ju ndihmojnë të mbani shtëpinë të rregullt dhe rrobat tuaja të zgjasin më shumë, transmeton Telegrafi.
1. Përdorni qese vakumi për rroba
shutterstock
Qeset e vakumit zvogëlojnë dukshëm vëllimin e rrobave dhe i mbrojnë nga pluhuri, lagështia dhe erërat e pakëndshme. Janë ideale për pulovra të trasha, xhaketa dhe pallto dimërore. Mund t’i vendosni në rafte, poshtë shtratit ose brenda dollapëve. Për më tepër, mund t’i shënoni lehtësisht me marker, p.sh. “Dimër 2025”, që të gjeni shpejt çfarë ju duhet.
2. Shfrytëzoni hapësirën poshtë shtratit
shutterstock
Kjo hapësirë shpesh mbetet e pashfrytëzuar. Siguroni kuti të ulëta ose çanta speciale për ruajtjen e rrobave, të cilat futen dhe nxirren lehtësisht. Në këtë mënyrë çlironi vend në dollap, ndërsa rrobat qëndrojnë të mbrojtura nga pluhuri.
3. Përdorni me zgjuarsi lartësinë e dollapit
shutterstock
Rafte të larta janë ideale për veshjet sezonale që nuk i përdorni për momentin. Vendosini në kuti ose çanta prej pëlhure dhe shpërndajini në nivelet e sipërme. Nëse është e mundur, shënoni kutitë me foto ose etiketa për të ditur gjithmonë çfarë gjendet brenda.
4. Shfrytëzoni dyert e dollapit ose muret
shutterstock
Ekzistojnë mbajtëse dhe grepa special që montohen në dyert e dollapëve ose në mur. Janë të përsosur për shalle, rripa, kapele dhe aksesorë të vegjël. Kështu çlironi hapësirë në sirtarë, ndërsa gjërat e vogla mbeten të dukshme dhe të lehta për t’u marrë.
5. Rotacion sezonal i veshjeve
shutterstockNjë praktikë e dobishme është që veshjet t’i ndryshoni sipas sezonit: ato që nuk përdorni për momentin i paketoni dhe i ruani. Kjo lë më shumë vend për rrobat aktuale dhe e bën organizimin më të lehtë. Njëkohësisht, kontrolloni herë pas here rrobat e vjetra , ndoshta disa nuk i vishni më dhe mund t’i dhuroni ose t’i shisni.
6. Ruani rrobat në kushte të përshtatshme
Për ruajtje korrekte, mbajini në vend të thatë dhe të errët. Përdorni freskues ambienti ose qese me livandë për të shmangur erërat e pakëndshme dhe molën. Për materiale të brishta ose prej leshi përdorni çanta prej pëlhure që “marrin frymë” ose letër të posaçme për veshje.
7. Organizatorë për veshje të vogla
shutterstock
Për çorape, të brendshme, doreza apo rripa, është praktik përdorimi i kutive të vogla, organizatorëve prej pëlhure ose ndarëseve të sirtarëve. Kështu çdo gjë ka vendin e vet dhe shmanget mbushja e panevojshme.
8. Etiketa dhe organizim vizual
Shënimi i kutive dhe çantave është thelbësor, përdorni ngjitës, etiketa letre ose edhe fotografi të përmbajtjes. Kur i ktheni rrobat në vend, menjëherë e dini se ku çfarë shkon dhe kurseni kohë kur kërkoni.
shutterstock
/Telegrafi/