Në dhjetë komuna në Serbi të dielën u mbajtën zgjedhjet lokale.Lista paralele, shkopinj, rrahje, koka të përgjakura – të gjitha këto u regjistruan gjatë ditës në Bor, Bajina Bashta e Kula, ka njoftuar “N1”.
Përveç këtyre qyteteve – u votua edhe në Knjazhevac, Sevojno, Kladovo, Smederevska Palanka, Arangjeelovac, Luçani dhe Majdanpek. Të gjitha vendet shënuan një dalje mjaft të lartë në votime, në disa edhe rreth 60 për qind. Qendrat e votimit ishin hapura deri në orën 20:00.
Nëse dita e zgjedhjeve njihet që në mëngjes, ishte vetëm çështje kohe kur nga gomat e shpuara do të kalohej te kokat e përgjakura. Në qendër të Bajina Bashtës, në një parking të ndriçuar, gjatë natës u shpuan gomat e gjashtë makinave të misioneve të ndryshme vëzhguese. Megjithatë, kjo ishte vetëm hyrje në skena të dhunës së vërtetë në rrugë.
Para se makina të shkatërrohej nga persona me shkopinj në Bajina Bashta, në të njëjtin vend, më herët, ndodhën edhe dy sulme të tjera. Në njërin prej tyre, në një video ku shihet një burrë që del nga makina me pistoletë në dorë, u sulmua edhe një gazetar i portalit “Zoomer”, kur u përpoq të filmonte një grup të rinjsh me kapuça të zinj.
“Kur fillova të filmoj, m’u afrua një djalë më i shëndoshë i veshur me të zeza dhe u përpoq të më marrë telefonin. Kur unë kundërshtova, sepse nuk doja t’ia jepja, ai më goditi disa herë me grusht në kokë”, tregoi gazetari i portalit Zoomer, Darko Gligorijeviq.
Kush është personi me pistoletë nuk është bërë e ditur nga policia, por kush janë të rinjtë që rrihnin qytetarë, vëzhgues dhe gazetarë, e zbuloi shpejt kryetarja e Kuvendit. Duke shpërndarë videon, Ana Brnabiq shkroi: “Kjo është një përpjekje për të mbrojtur demokracinë nga bllokuesit”.
Me grushta dhe shkopinj “u mbrojt demokracia” edhe në Bor. Një nga përleshjet ndodhi para selisë së Partisë Progresive Serbe, madje drejtpërdrejt në programin e TV Nova.
Mes të plagosurve ishte edhe një vëzhgues i organizatës joqeveritare CRTA.
“Këtu bëhet fjalë për një situatë ku edhe një polic kërcënoi me armë për t’i qetësuar tensionet, ndërsa sulmuesit thanë ‘nuk na intereson’ dhe sulmuan qytetarët dhe vëzhguesin tonë”, tha Rasha Nedeljkov nga CRTA.
Ata “djem të zakonshëm” në fakt ishin studentë, anëtarë të ekipit mobil. Në një video të publikuar nga “Studenti u blokadi”, deputetja Mila Popoviq pretendon se ka identifikuar disa zyrtarë lokalë.
“Do të t’i thyej të gjitha kockat në trup, edhe ty po ashtu”, dëgjohet në video.
Dhuna shkoi edhe më tej – studentët pretendojnë se pranë një qendre votimi në Bor, një grup personash i sulmoi me sëpatë nga një makinë “Audi” me targa të Pançevës. Mes të plagosurve është edhe gazetari Lazar Diniq, i cili u dërgua në spital me lëndime në kokë.
Një grup tjetër në të njëjtin qytet ndoqi studentët pasi ata po filmonin një makinë për të cilën dyshohej se përdorej për lista paralele të votuesve. Në një video të CRTA-s, shihet se si fillimisht goditet një studente, ndërsa një student tjetër rrëzohet në tokë dhe rrihet.
Nuk ishte e lehtë as për vullnetarët. Dy vajza në Arangjelovac pretendojnë se në stacionin e autobusëve zbuluan të ashtuquajturin “treni bullgar”.
“Silleshin fletëvotime bosh, plotësoheshin dhe më pas çoheshin në vendvotim”, tregoi njëra prej tyre.
Një tjetër vullnetare tregoi se u ndoq nga një person me maskë pasi tentoi të filmonte makina të dyshimta në parking.
Edhe në Knjazhevac, sipas opozitës, votat po tregtoheshin në stacionin e autobusëve. Objekte gastronomike janë identifikuar si vende organizimi. Në Kladovo pati dyshime për lista paralele.
Në Kula, policia kontrolloi një automjet për të njëjtat dyshime, ndërsa tensionet u rritën gjatë ditës. Një grup personash me shufra metalike u përplas me qytetarë dhe të paktën një person u plagos.
Në vendet tjera pati parregullsi më të vogla.
Presidenti i Serbisë, Aleksandar Vuçiq, në një adresim për media të dielën mbrëma foli për “shpëtimin nga një e keqe e madhe”.
“Disa njerëz nxorën armët, keqtrajtuan njerëzit. Hynë me dhunë në qendra. Por, mendoj se mendimet revolucionare ua turbullojnë trurin njerëzve, kështu që nuk mund të dallojnë çfarë është mirë e çfarë e keqe”, tha Vuçiq, transmeton “B92”.
Vuçiq ka shpallur fitoren në shumicën e komunave.
“Projekti për raportimin mbi krimin e organizuar dhe korrupsionin”, një organizatë joqeveritare që përkrah gazetarinë investigative, ka raportuar të shtunën se si partia në pushtet e Aleksandar Vuçiqit, SNS, i ka shndërruar garat e vogla komunale në fushëbetejë kombëtare të financuar fuqishëm dhe se “janë vendosur monitorues ‘fantazmë’ amerikanë ultra të djathtë”.
Sinjali – aty ku e vërteta flet para lajmit!
