Kur stili takohet me thjeshtësinë, frizura e re e Amal Clooney është kombinimi perfekt i volumit, butësisë dhe shkëlqimit. Zbuloni si ta realizoni vetë në shtëpi, me disa produkte të thjeshta dhe truket e stilistit të saj personal
Me ardhjen e sezonit të ri, shumë prej nesh dëshirojnë një ndryshim, të vogël, por të dukshëm. Dhe pak femra e personifikojnë elegancën aq mirë sa Amal Clooney, e cila ka debutuar një frizurë të re që po bëhet trendi i momentit në botën e bukurisë.
Falë frizerit të famshëm Dimitris Giannetos, që kujdeset për imazhin e saj, tani mund ta rikrijoni këtë pamje edhe në kushte shtëpie, një “bubble blowout” që kombinon volum, butësi dhe lëvizje natyrale të flokëve.
Çfarë e bën të veçantë këtë frizurë?
Ngjyra “pecan pie brown” e flokëve të Amal Clooney, një kafe e ngrohtë me reflektime të lehta karameli, i jep pamjes ndjesinë e ngrohtësisë dhe dritës. Në daljen e saj në Albie Awards, organizuar nga fondacioni që drejton me bashkëshortin George Clooney, ajo mahniti me flokë plot volum që rridhnin butë mbi supe.
Giannetos, i cili publikoi pamjen në Instagram, e përshkroi si “bubble blowout”, një interpretim modern i stilit klasik të viteve ’90, me një përfundim më të butë dhe më të rafinuar, transmeton Telegrafi.
Si ta realizoni “Bubble Blowout” në shtëpi
Sipas Giannetos, sekreti është në dy faza kryesore: përgatitja dhe fiksimi. Ja hapat për ta provuar vetë:
Përgatitja e flokëve: Lani flokët me shampo hidratuese dhe aplikoni balsam të lehtë. Më pas, spërkatni një sprej mbrojtës nga nxehtësia ose një produkt me efekt shkëlqimi, që nuk rëndon flokun.
Tharja me volumin e duhur: Përdorni një tharëse flokësh me difuzer ose grykë të ngushtë dhe një furçë të rrumbullakët. Punohet çdo seksion duke e krehur nga brenda jashtë për të krijuar formën karakteristike “bubble”.
Fiksimi i formës: Pasi të keni tharë çdo seksion, rrotullojeni lehtë në brenda dhe fiksojeni me kapëse për disa minuta që të ftohet dhe të ruajë formën.
Finalizimi: Hiqni kapëset, krihni butë drejt brendësisë dhe përfundoni me lak për volum të mesëm, që ruan formën pa e ngurtësuar flokun.
Pse është perfekt për këtë sezon
Ndërsa bob-et mbeten në trend, për ato që duan të ruajnë gjatësinë, stili i Amal Clooney është frymëzim ideal.
Ngjyra e ngrohtë, valëzimet e buta dhe efekti “ajror” krijojnë ndjesinë e një rinovimi elegant për vjeshtë, një kombinim mes klasikes dhe bashkëkohores.
💡 Këshilla e stilistit:
“Sekreti i një ‘bubble blowout’ të përsosur është volumi nga brenda, jo jashtë. Floku duhet të duket i mbushur, por natyral – si të kishte ajër në të”, thotë Giannetos për ELLE Magazine. /Telegrafi/