SHBA-ja ia bllokon pjesëmarrjen udhëheqësit palestinez në takimin e OKB-së në Nju Jork

news image

Presidenti palestinez, Mahmoud Abbas, është ndaluar të marrë pjesë në seancën e Asamblesë së Përgjithshme të Kombeve të Bashkuara në New York muajin e ardhshëm, pasi atij dhe 80 zyrtarëve të tjerë u janë revokuar vizat, ka njoftuar Departamenti i Shtetit.

Sekretari amerikan, Marco Rubio, i ka fajësuar zyrtarët palestinezë për minim të përpjekjeve për paqe, duke thënë se ata po kërkojnë “njohje të njëanshme të një shteti të supozuar palestinez”.

Vendimi, i mirëpritur nga Izraeli, konsiderohet i pazakontë pasi SHBA-ja zakonisht lehtëson udhëtimin për zyrtarët e të gjitha shteteve që dëshirojnë të marrin pjesë në seancat e OKB-së, raportoi BBC.

Ndalimi vjen në një kohë kur Franca po udhëheq përpjekjet ndërkombëtare për njohjen e shtetit palestinez në Asamblenë e Përgjithshme – një lëvizje që administrata e Donald Trumpit e ka kundërshtuar.

Zyra e Abbasit ka deklaruar se vendimi shkel të drejtën ndërkombëtare dhe Marrëveshjen e OKB-së.

Sinjali – aty ku e vërteta flet para lajmit!

/GazetaSinjali/